Qaırat Boranbaevtan tárkilengen Astanadaǵy qonaqúıge kim ıelik etedi

Astana qalasynyń ákimi Jeńis Qasymbek Qaırat Boranbaevtyń memleketke tapsyrǵan quny 1,4 mlrd teńgeden asatyn Comfort Hotel Astana qonaqúıiniń aldaǵy taǵdyry týraly aıtty, dep habarlaıdy Kazinform.

«Qaırat Boranbaev tergeýmen erikti túrde kelisimge kelý aıasynda memleketke birqatar aktıvin, sonyń ishinde Comfort Hotel Astana qonaqúı kesheni men fıtnes ortalyǵyn tapsyrdy. Onda ońaltý jáne bilim berý ortalyqtary uıymdastyrylýy kerek dep aıtyldy. Olar uıymdastyryla ma? Bul nysandardy ortalyq retinde ishinara nemese tolyǵymen qaıta qurasyzdar ma?», - dep surady jýrnalıst Ortalyq kommýnıkatsııalar qyzmetinde ótken baspasóz máslıhatynda.

Jeńis Qasymbek Astanaǵa tek Comfort Hotel Astana beriletinin aıtty. Fıtnes ortalyǵy berilmeıdi, óıtkeni bas kompanııa basqa qalada ornalasqan jáne sol jerden basqarylýy múmkin.

«Comfort Hotel Astana boıynsha – ótkizý protsesi áli júrip jatyr. Tapsyrý protsesi aıaqtalǵannan keıin ári qaraıǵy qyzmet túrin anyqtaımyz. Biraq qazirden aıtarym, qalamyzǵa mundaı deńgeıdegi qonaqúıler jetispeıdi. Qonaqúı óziniń qyzmet profılin saqtaýy da múmkin. Alaıda nysan áli berilmedi, bul protsess júrip jatyr», - dep túsindirdi qala ákimi.

Qala basshysynyń aıtýynsha, nysandy balansqa qabyldaý aldaǵy toqsanda aıaqtalýy qajet.

«Bizde mektepke deıingi mekemeler, áleýmettik nysandar, ońaltý ortalyqtary jáne basqa da mekemeler boıynsha óz josparymyz bar. Bul nysandy áleýmettik nysandarǵa berýdiń qajeti joq. Týrızmdi damytý bóliginde qalaǵa dál osy deńgeıdegi qonaqúıler qajet», - dep tolyqtyrdy Jeńis Qasymbek.

Buǵan deıin Kazinform kásipker Qaırat Boranbaevtyń memleket menshigine qaıtarǵan aktıvterine sholý usynǵan edi.

Bıylǵy 6 qarashada Qaırat Boranbaev bostandyqqa shyqty.