Qaırat Boranbaevqa tıesli gaz kompanııanyń aktıvteri buǵattaldy

ASTANA. QazAqparat - Qarjylyq monıtorıng agenttigi «AzııaGazChýndja» JShS quryltaıshylary Qaırat Boranbaev pen Roman Nahanovqa jáne «Qazaq Gaz» AQ Basqarma tóraǵasynyń burynǵy orynbasary Taır Januzaqqa qatysty isti tergeýdi aıaqtady. Olarǵa suıytylǵan munaı gazyn satyp alý kezinde 14,5 mlrd teńge urlaý jáne qylmystyq kiristerdi zańdastyrý faktileri boıynsha aıyptar taǵylýda, dep habarlaıdy QazAqparat.

Bas prokýratýra isti sottyń qaraýyna jiberdi.

«Ulttyq kompanııaǵa keltirilgen zalal «Qazaq Gaz» AQ shottaryna aýdarý arqyly tolyq kólemde óteldi. Aıaqtalǵan is sheńberinde azamattyq talap qoıý jáne múlikti tárkileý bóliginde úkimniń oryndalýyn qamtamasyz etý maqsatynda aıyptalýshylardyń 38 mlrd teńge somasyndaǵy aqshalaı qarajatyna, 15 jyljymaıtyn múlik obektisine, 3 avtokólik quralyna tyıym salyndy», - delingen habarlamada.

Agenttik Qaırat Boranbaevqa jáne basqa adamdarǵa qatysty gaz eksporty kezinde urlaý jáne qylmystyq jolmen alynǵan múlikti zańdastyrý faktileri boıynsha bólingen ister sheńberinde sotqa deıingi tergeýdi jalǵastyrýda.

Esterińizge sala keteıik, Qarjylyq monıtorıng agenttigi Qaırat Boranbaevtyń ústinen kvazımemlekettik sektorda asa iri kólemde qarajat jymqyrý faktisimen is qozǵap, ızolıatorǵa qamaǵan bolatyn.

Qazirgi ýaqytta iri mólsherde, onyń ishinde shetelde qylmystyq kiristi zańdastyrý belgileri bar neǵurlym rezonanstyq isterdi tergep-tekserý erekshe baqylaýda.