Qaırat Boranbaevqa tıesili bolǵan Almaly saýda ortalyǵynda balalarǵa arnalǵan mýzeı ashylady

ALMATY. KAZINFORM - Almaty ákimdiginiń aldynda ornalasqan “Almaly” saýda ortalyǵynda endi balalarǵa arnalǵan Ǵylym mýzeıi qurylady. Bul týraly qalalyq máslıhattyń kezekten tys HHV sessııasynda Almaty ákimi Erbolat Dosaev aıtty.

Qala basshysynyń aıtýynsha, tıisti jumystar 2025 jyly bastalady. Oǵan qala bıýdjetinen 12 mlrd teńgeden astam qarajat bólingen.

— Memleket basshysynyń qoldaýyn eskere otyryp, 2025 jyldan bastap Almatyda burynǵy «Almaly» saýda ortalyǵynyń bazasynda Science Museum Singapore-men birlesip, balalarǵa arnalǵan TMD-daǵy alǵashqy Ǵylym mýzeıin qurý jumystary bastalady. Bul maqsatqa qala bıýdjetinen 12,2 mlrd.teńge bólý josparlanǵan, — dedi Erbolat Dosaev.

Eske salaıyq, byltyr Qaırat Boranbaev «Almaly» saýda ortalyǵy men birqatar nysandy memleketke bergenin jazǵanbyz. 

Sondaı-aq Almatyda qansha ǵımarat memleketke qaıtarylyp, aýktsıonda satylǵanyn jazǵan edik.