Qaırat Boranbaevqa elektrondy bilezik taǵý týraly sheshim qabyldanǵan joq – agenttik
ASTANA. KAZINFORM – Qaırat Boranbaev bıýdjet qarajatyn jymqyrý, salyq tóleýden jaltarý kúdigine ilikti. Bul týraly atalǵan Qarjylyq monıtorıng agenttigi tóraǵasynyń orynbasary Jeńis Elemesov aıtty.
Búgin Parlament Májilisinde bolǵan baspasóz máslıhatynda tilshiler «Іsti bolǵan Qaırat Boranbaevqa qatysty jańa qylmystyq isti qozǵaý qarastyrylda ma?» dep surady.
«Buǵan deıin sot úkimimen ol kináli dep tanylyp, qylmystyq jaýapkershilikke tartyldy. Oǵan bas bostandyǵynan aıyrý jazasy taǵaıyndalǵanyn, keıin keltirilgen zalaldy tolyǵymen ótegendikten, bas bostandyǵyn shekteýge aýystyrylǵanyn bilesizder», - dedi J. Elemesov.
Oǵan qatysty basqa sharalar qarastyrylmaǵan, ıaǵnı elektrondy bilezik taǵý sııaqty sheshim qabyldanbaǵan.
«Elektrondy bilezik taǵyp júrgen joq. Onyń bas bostandyǵyn shekteý bar. Bultartpaý sharasyn tańdaýdyń qajeti joq, óıtkeni ol sottalǵan is aıasynda qazirdiń ózinde shekteý bar», - dedi Jeńis Elemesov.
Sonymen qatar tilshiler jańa ister qaı jaǵdaıǵa qatysty jalǵasyp jatqanyn surady.
«Ol bıýdjet qarajatyn jymqyrý, salyq tóleýden jaltarý kúdigine ilikti», - dedi agenttik tóraǵasynyń orynbasary.
Onyń aıtýynsha, «Qaırat» fýtbol klýby boıynsha Boranbaevqa qatysty tergeý amaldary qarastyrylmaǵan.
Bıyl naýryz aıynda Qaırat Boranbaev bıýdjetke taǵy 120 mlrd teńge aýdarǵany habarlanǵan edi. Sondaı-aq onyń salyq tóleýden jaltarý, qarajat jymqyrý áreketteri tekserilip jatqany málim boldy.
Eske sala keteıik, bas bostandyǵynan aıyrý jazasynyń ótelmegen bóligi bas bostandyǵyn shekteý túrindegi jazaǵa aýystyrylǵan Qaırat Boranbaev 2023 jylǵy 6 qarashada bas bostandyǵynan aıyrý oryndarynan bosatylyp, turǵylyqty jeri boıynsha jazasyn óteý ornyna jiberildi.
Atap aıtqanda, 2023 jyldyń qazan aıynda onyń jazasy jeńildetilgen edi.
