Qaırat Boranbaev óz erkimen taǵy 30 mlrd teńgeni memleketke qaıtardy

Qaırat Boranbaevqa ózine qatysty júrgizilip jatqan tergeý amaldary aıasynda óz erkimen Bilim berý ınfraqurylymyn qoldaý qoryna 30 mlrd teńgeden astam qarjy aýdardy, dep habarlaıdy Kazinform Qarjylyq monıtorıng agenttigine silteme jasap.

«Qaırat Boranbaevqa qatysty júrgizilip jatqan sotqa deıingi tergep-tekserý aıasynda ol óz erkimen tergeýmen yntymaqtasý nıeti týraly málimdedi.

Boranbaevqa tıesili kompanııalar shetelden qaıtarylǵan qarajat túrinde Bilim berý ınfraqurylymyn qoldaý qoryna 66 mln AQSh dollaryn, ıaǵnı 30 mlrd teńgeden astam qarjy aýdardy», - delingen aqparatta.

Eske salaıyq, kógildir otyndy ákelý kezinde qarajat urlaý faktisi boıynsha júrgizilgen tergeý aıasynda Boranbaev 14,5 mlrd teńge kóleminde materıaldyq shyǵyndy ótegen bolatyn. Bul qarajat qoldanystaǵy zańnamaǵa sáıkes bilim berý salasyn qoldaýǵa, mektepter men basqa da oqý oryndaryn salýǵa jáne qaıta jańartýǵa, sondaı-aq búkil respýblıka boıynsha áleýmettik salaǵa baǵyttalady (QR Bıýdjet kodeksi 52-3 bap) dep josparlanǵan.

Eske salaıyq, keshe Q.Boranbaev quny 1,4 mlrd teńge bolatyn qonaq úıin memleket menshigine bergenin jazǵan edik Onyń aldynda 90 mlrd teńgeden astam somany quraıtyn aktıvterdi memleketke qaıtardy.

Eske salsaq, 2022 jyly 17 naýryzda sottyń sheshimimen Qaırat Boranbaev 2 aıǵa qamalǵan edi.

Keıin Qaırat Satybaldy men Qaırat Boranbaevtyń syrtqa zańsyz shyǵarylǵan aktıvteri qaıtaryla bastaǵany habarlandy.

Astanada sot otyrysy byltyr 30 jeltoqsanda bastaldy.

Sot sheshimimen Qaırat Boranbaevqa 8 jylǵa bas bostandyǵynan aıyrý jazasy taǵaıyndaldy. Keıin sotta bul úkim qaıta qaralyp, múlkin tárkileý jáne jazany eki jylǵa qysqartý belgilendi. 

Keıin sot Qaırat Boranbaevtyń tergeý organdarymen mámilege kelýin qanaǵattandyrdy. 

Qarjy mınıstri Erulan Jamaýbaev Boranbaevtyń tárkilengen múlki qaıda baǵyttalatynyn aıtqan bolatyn.