Qaırat Boranbaev Olımpıada-2018 boıynsha tuńǵysh qazaqstandyq alaýger boldy
ALMATY. QazAqparat - Qaırat Boranbaev Ońtústik Koreıadaǵy qysqy 2018-jylǵy Olımpıada oıyndarynyń Qazaqstan atynan alǵashqy alaýgeri boldy, dep habarlaıdy QazAqparat tilshisi.
QR Ulttyq paralımpıada komıtetiniń prezıdenti Qaırat Boranbaevtyń kandıdatýrasy Phenchhandaǵy uıymdastyrý komıtetimen bekitildi.
Qazaqstandyq sportshy alaýdy Chedjý qalasynda alyp ótti.
«Osyndaı dúbirli dodada Qazaqstannyń atynan shyǵý men úshin mártebe. Olımpıada oıyndaryna búkil álem kóz tigip otyr. Paralımpııalyq sport Olımpııalyq sportqa mańyzy jaǵynan teńelgeni qýantady. Qazaqstanda da Paralımpııalyq sportqa degen qyzyǵýshylyq artyp keledi. Alaýdy alyp júrýge Ulttyq paralımpıada komıtetiniń prezıdenti retinde meniń shaqyrylǵanymnyń ózi osyǵan úlken dálel. Barlyq sportshylarǵa jeńis tileımin», - dedi Qaırat Boranbaev.
Aıta ketý kerek, 24 qazanda Afıny qalasynda 2018 jyly Phenchhanda ótetin Olımpıadanyń alaýy saltanatty túrde káris delegatsııasyna tapsyryldy.
Alaý qazir Ońtústik Koreıanyń Inchhon qalasyna jetkizildi.
Ońtústik Koreıada osymen ekinshi ret Olımpıada oıyndary ótip jatyr. 1988 jyly Jazǵy Olımpıada oıyndary Seýlde ótken bolatyn.
