Qaırat Boranbaev Almatydaǵy iri saýda ortalyǵy men birqatar nysandy memleketke berdi

«Qarjylyq monıtorıng agenttigi Qaırat Boranbaevtyń múlkin memleket menshigine qaıtarý sharalaryn júrgizip jatyr.

Memleket kirisine jalpy quny 33,75 mlrd teńge bolatyn keńse, saýda jáne oıyn-saýyq kesheni, sondaı-aq saýyqtyrý jáne fıtnes jelisi ótti.

Atap aıtqanda, ońtústik megapolıstiń ortalyǵynda ornalasqan «Almaly» saýda ortalyǵynyń ǵımaraty, sondaı-aq jalǵa berý jáne múlikti basqarýmen aınalysatyn «Unity Hall» JShS.

«Almaty Taýers» bıznes ortalyǵynda ornalasqan nysannyń aýdany 11 myń sharshy metrden asady.

Sondaı-aq, «Fitnation» fıtnes klýbtar jelisi memleket menshigine ótti», - delingen agenttik habarlamasynda.

Málim etilgendeı, atalǵan nysandar Astana, Almaty jáne Qostanaı qalalarynda ornalasqan. Endi ol nysandar qoldanystaǵy zańnamaǵa sáıkes demalys, saýyqtyrý jáne bilim berý ortalyqtaryn uıymdastyra otyryp, áleýmettik maqsattarǵa paıdalanylatyn bolady.

Qarjylyq monıtorıng agenttigi aktıvterdi qaıtarý jumystary jalǵasyp jatqanyn málim etti.

Eske salaıyq, keshe Qaırat Boranbaevqa ózine qatysty júrgizilip jatqan tergeý amaldary aıasynda óz erkimen Bilim berý ınfraqurylymyn qoldaý qoryna 30 mlrd teńgeden astam qarjy aýdarǵan bolatyn.

Onyń aldynda Boranbaev quny 1,4 mlrd teńge bolatyn qonaq úıin, sondaı-aq 90 mlrd teńgeden astam somany quraıtyn aktıvterdi memleketke qaıtardy.

2022 jyly 17 naýryzda sottyń sheshimimen Qaırat Boranbaev 2 aıǵa qamalǵan edi.

Keıin Qaırat Satybaldy men Qaırat Boranbaevtyń syrtqa zańsyz shyǵarylǵan aktıvteri qaıtaryla bastaǵany habarlandy.

Astanada sot otyrysy byltyr 30 jeltoqsanda bastaldy.

Sot sheshimimen Qaırat Boranbaevqa 8 jylǵa bas bostandyǵynan aıyrý jazasy taǵaıyndaldy. Keıin sotta bul úkim qaıta qaralyp, múlkin tárkileý jáne jazany eki jylǵa qysqartý belgilendi.

Keıin sot Qaırat Boranbaevtyń tergeý organdarymen mámilege kelýin qanaǵattandyrdy.

Qarjy mınıstri Erulan Jamaýbaev Boranbaevtyń tárkilengen múlki qaıda baǵyttalatynyn aıtqan bolatyn.