«Qaırat» bas bapkeri «Levskıge» qarsy qarymta matchtaǵy josparyn aıtty
TÚRKІSTAN. KAZINFORM – UEFA Chempıondar lıgasynyń úshinshi irikteý kezeńi aıasynda Almatynyń «Qaırat» fýtbol klýby «Túrkistan Arenada» Bolgarııanyń «Levskı» komandasyn qabyldaıdy. Qarymta kezdesý aldynda eki komanda ókilderi matchqa daıyndyǵy men oıyn jospary týraly aıtty.
«Levskı» bas bapkeri Hýlıo Velaskes jaýapty kezdesý aldynda ystyq aýa raıyna alańdaýly ekenin málimdedi.
– Aptap ystyq – eskeretin faktor. Sol sebepti matchqa erterek kelip, aýa raıyna beıimdelýge tyrystyq. Degenmen syltaý izdemeımiz. Biz alańǵa oınaý úshin shyǵamyz, – dedi ıspanııalyq maman.
Bas bapker «Qaırattyń» oıyn mánerine de toqtalyp, almatylyq klýbtyń taktıkalyq ózgeristerine daıyn bolý kerektigin jetkizdi.
– Olar qarsylastyń alańynda qysym kórsetip, keıin orta nemese tómen qorǵanys shebine aýysa alady. Sondyqtan olardyń ornalasýyna qaraı shabýylda durys jaýap berýge tıispiz. Dop qarsylasta bolǵan kezde de saýatty qorǵanýymyz qajet, – dedi ol.
«Levskıdiń» brazılııalyq shabýylshysy Reınaldo alǵashqy kezdesýdegi basymdyqty saqtap qalý úshin komanda sońyna deıin kúresetinin atap ótti.
– Bizde artyqshylyq bar, biraq bosańsýǵa bolmaıtynyn jaqsy túsinemiz. Klımattyq jaǵdaı eki komanda úshin de birdeı, sondyqtan oǵan beıimdelip, oınaýymyz kerek, – dedi Reınaldo.
Al «Qaırat» bas bapkeri Rafael Ýrazbahtın alǵashqy kezdesýdegi jeńiliske qaramastan, komanda qarymta matchta ese qaıtarýǵa daıyn ekenin aıtty.
– Kez kelgen jeńilis jaǵymsyz áser qaldyrady. Ásirese sońǵy mınýttarda gol jiberip alǵanymyz jigitterdiń kóńil kúıine áser etti. Degenmen komandada jiger bar. Qarymta kezdesýde jeńis úshin bar kúshimizdi salamyz, – dedi Ýrazbahtın.
Bas bapker «Qaırattyń» aldaǵy oıynda shabýylda belsendi áreket etetinin jetkizdi.
– Qarsylastyń jyldam oıynshylary bar. Sondyqtan shabýyl men qorǵanys arasyndaǵy tepe-teńdikti saqtap, saýatty oıyn kórsetýimiz qajet, – dedi Ýrazbahtın.
Komandanyń daıyndyǵy týraly «Qaırat» oıynshysy Oljas Baıbek te pikir bildirdi.
– Eshqandaı jaraqat joq. Oıynǵa tolyq daıynbyz, – dedi ol.
Bas bapker jankúıerlerdiń qoldaýy komandaǵa jiger beretinin aıtty.
– Almatydan ǵana emes, basqa óńirlerden keletin jankúıerlerdiń de bizdi qoldaıtyny qýantady. Olardyń qoldaýy bizge qosymsha kúsh beredi, – dedi «Qaırat» bas bapkeri.
Buǵan deıin «Qaırat» Chempıondar lıgasynda «Levskıge» ese jibergenin jazǵan edik.
