«Qaırat» «Arsenalmen» kezdesý aldynda Londonda jattyǵý ótkizdi
ASTANA. KAZINFORM — Qazaqstandyq «Qaırat» komandasy UEFA Chempıondar lıgasy negizgi kezeńiniń segizinshi týryndaǵy Anglııanyń «Arsenalymen» kezdesýi aldynda Londondaǵy «Emıreıts» stadıonynda jattyǵý júrgizdi.
Kezdesý 28 qańtardan 29-na qaraǵan túni saǵat 1:00–de Anglııa astanasy London qalasyndaǵy «Emıreıts» stadıonynda bastalyp, «Qazaqstan» telearnasynan tikeleı efırde kórsetiledi.
Ashyq jattyǵý barysynda komandanyń barlyq kóshbasshysy oıynshylary jasyl alańǵa shyqty. Olardyń arasynda Dastan Sátpaev pen Azamat Tuıaqbaev joq. Olar jaraqatyna baılanysty komandamen Londonǵa kelgen joq.
«Qaırattyń» jankúıerler sektoryna eki myń bılet bólingen edi. Satýǵa shyqqannan keıin bir saǵattaı ýaqyt ótkende ol túgeldeı ótip ketti.
Aıta ketsek, 60 myńnan astam jankúıerge arnalǵan «Emıreıts» stadıonynyń paıdalanýǵa berilgenine bıyl jıyrma jyl tolady. Onda «Arsenal» óz alańyndaǵy oıyndaryn ótkizedi.
Osyǵan deıin negizgi kezeńde «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4 esebimen jol berse, Kıprdiń «Pafosymen» 0:0 esebimen teń tústi.
Aǵylshyndyq komanda jarys barysynda Ispanııanyń «Atletık Bılbao» (2:0), Grekııanyń «Olımpıakos» (2:0), Ispanııanyń «Atletıko Madrıd» (4:0), Chehııanyń «Slavııa» (3:0), Germanııanyń «Bavarııa» (3:1), Belgııanyń «Brıýgge» (3:0), Italııanyń «Inter» (3:1) klýbtarynan basym tústi.
Eske salsaq, budan buryn «Qaırattyń» bas bapkeri Rafael Ýrazbahtın: «Arsenalmen» kezdesýde sapaly oıyn kórsetý mańyzdy ekenin aıtty.