«Qaırat» Almatyda ótetin Konferentsııalar lıgasynyń alǵashqy matchyna daıyn ba
ALMATY. KAZINFORM – ÝEFA Konferentsııalar lıgasy aıasynda 22 qazan saǵat 19:30-da «Qaırat» grekııalyq «Panatınaıkos» komandasyn Ortalyq stadıonda qabyldaıdy.
Match aldyndaǵy baspasóz máslıhatynda «Qaırat» fýtbol klýbynyń bas bapkeri Rafael Ýrazbahtın men almatylyq komandanyń shabýylshysy Mark Gýal óz oılarymen bólisti.
Rafael Ýrazbahtın komanda úshin el birinshiligindegi oıyndar men eýrokýbok matchtarynyń mańyzy birdeı ekenin atap ótti. Degenmen halyqaralyq oıyndarynda fýtbolshylardyń yntasy erekshe bolatynyn moıyndady.
- Eýrokýbok matchtaryna jigitterdi erekshe baptaýdyń qajeti joq. Olardyń jınaqy ekeni kórinip turady. Biz úshin bul - myqty oıynshylarǵa qarsy ózimizdi synap, oıynymyzdy kórsetýge berilgen úlken múmkindik. Ár sátti baǵalaı bilý kerek, muny jigitter de túsinedi, - dedi ol.
Tyǵyz kúntizbe men komandanyń jaǵdaıy týraly suraqqa jaýap bergen bapker komandanyń tolyq demalyp úlgermeı júrgenin moıyndady. Biraq oıynshylardyń mundaı jaǵdaıǵa beıimdelýi jaqsarǵan.
- Jalpy alǵanda kishkene sharshaý bar. Utylyp qalǵan kezde, árıne, fızıkalyq turǵydan ǵana emes, emotsıonaldy túrde de sharshaıdy. Biraq jaǵdaıǵa úırenip kelemiz. Eger ótken jyly bizge 2-3 kún saıyn ótken matchtar aýyr tıse, qazir biz kóbirek beıimdeldik. Jigitter aýyr júktemelerdi jeńilirek kóteredi, ári tájirıbeleri de bar, - dedi Rafael Ýrazbahtın.
Aldaǵy qarsylasyna toqtalǵan almatylyq bapker grekııalyq «Panatınaıkos» klýbynyń tereń tarıhy men jetistikterin qurmetteıtinin aıtyp, komandada joǵary deńgeıli oıynshylardyń bar ekenin atap ótti.
- Máselen De Vreıdi alaıyq, bul oıynshynyń bedeli kóp nárseni aıtyp tur. Komandada birqatar joǵary deńgeıli oıynshylar bar. Biraq kez kelgen qarsylaspen oınaýǵa bolady, ári biz úıde oınaımyz. Biz qarsylasty qurmetteımiz, biraq eshkimnen qoryqpaımyz. Bizge barynsha batyl, tártipti oınaýǵa tyrysyp, óz múmkindikterimizdi paıdalaný mańyzdy, — dedi Rafael Ýrazbahtın.
«Qaırat» shabýylshysy Mark Gýal myqty qarsylastarǵa qarsy oınaý múmkindigin artyqshylyq dep atady.
- Men úshin myqtylarmen oınaý — bul artyqshylyq. Komanda durys jolda kele jatyr dep esepteımin. Osyndaı komandalarmen, Konferentsııalar lıgasynyń top-oıynshylarymen oınaýdyń sáti túsip jatqanyna qýanyshtymyz. Matchtardyń qalaı ótetinin kóremiz, ár oıynǵa jeke daıyndalamyz. Kelesi kezeńge ótý múmkindigi sonda belgili bolady, — dedi oıynshy.
Eske salaıyq, «Panatınaıkosqa» qarsy oıyn «Qaırat» úshin osy maýsymnyń ÝEFA Konferentsııalar lıgasyndaǵy ekinshi, al óz alańyndaǵy birinshi matchy. Týrnırdegi alǵashqy kezdesýin syrt alańda ótkizgen almatylyqtar «Rıga» komandasymen teń tústi.
