«Qaırat» álemdegi úzdik fýtbol klýbtarynyń qataryna endi

ASTANA. KAZINFORM — Halyqaralyq fýtbol tarıhy jáne statıstıkasy federatsııasy (IFFHS) álemdegi eń úzdik 500 fýtbol klýbynyń jańartylǵan reıtıngin jarııalady. 

Atalǵan tizimge Qazaqstannan tek almatylyq «Qaırat» fýtbol klýby endi. Klýb 90,75 upaımen 240-oryndy ıelendi.

Reıtıngtiń kóshin Frantsııanyń «Parı Sen-Jermen» klýby bastady. Ekinshi orynda — madrıdtik «Real», al úshinshi orynǵa — londondyq «Chelsı» turaqtady.

Buǵan deıin «Qaırat» qaqpashysy Temirlan Anarbekovtiń bedeldi reıtıngte Kılıan Mbappeden ozyp shyqqany habarlanǵan bolatyn.

Bedeldi SofaScore fýtbol portaly 2025/26 maýsymyndaǵy ÝEFA Chempıondar lıgasynyń jalpy kezeńiniń altynshy týrynan keıin fýtbolshylardyń jańartylǵan reıtıngin jarııalady. Bul reıtıng fýtbolshylardyń oıyn statıstıkasyna negizdelgen.

Atalǵan tizimde Temirlan Anarbekov eń joǵary baǵamen kósh bastady. Ol jalpy kezeńde tórt matchqa («Pafos», «Kopengagen», «Olımpıakos» jáne «Inter» klýbtaryna qarsy) qatysyp, sarapshylardan ortaq eseppen 8,9 ball aldy.

Ekinshi orynda madrıdtik «Realdyń» shabýylshysy Kılıan Mbappe (8,34 ball), al úshinshi orynǵa «Galatasaraı» klýbynyń oıynshysy Vıktor Osımhen (8,33 ball) jaıǵasty.

Aıta keteıik, Temirlan Anarbekov — Chempıondar lıgasynda matchtyń úzdik oıynshysy (MVP) atanǵan alǵashqy qazaqstandyq fýtbolshy. Ol bul jetistikke altynshy týrda, Astanada ótken grek klýby «Olımpıakospen» matchtan keıin qol jetkizdi.