Qaırat Ábdirahmanov Joldaý boıynsha dıplomatııalyq qyzmet júıesin jetildirý jaıyn aıtyp berdi

ASTANA. QazAqparat -  Syrtqy ister mınıstri Qaırat Ábdirahmanov Memleket basshysy Nursultan Nazarbaevtyń halyqqa arnaǵan «Qazaqstandyqtardyń ál-aýqatynyń ósýi: Tabys pen turmys sapasyn arttyrý» atty joldaýynyń negizgi baǵyttary aıasynda Syrtqy ister mınıstrliginiń ınstıtýtsıonaldyq áleýetin damytý týraly aıtyp berdi, dep habarlaıdy QazAqparat mınıstrliktiń baspasóz qyzmetine silteme jasap.

«Kelesi jyldan bastap, faktorlyq-baldyq baǵalaý negizinde eńbekaqy tóleý júıesin engizý josparlanyp otyr. Bul júıe bir qyzmetkerdiń jumysynyń tıimdiligi men nátıjeligine negizdelgen jáne onyń qorytyndy nátıjesi men baǵalaýǵa baǵdarlanǵan. Bul máselede qyzmetti josparlaý birinshi kezekte turatyn bolady, sondyqtan dıplomatttardyń qyzmetine obektıvti baǵa berý úshin mindetterdi SІM-niń baǵdarlamalyq qujattarymen tyǵyz baılanstyryp belgileý qajet», - dep atap ótti Q.Ábdirahmanov syrtqy saıasat vedomstvosy qyzmetkerlerimen ótken jınalysta.

Mınıstrlik sybaılas jemqorlyq quqyq buzýshylyqtar jasaǵan adamdarǵa qatysty «nóldik tózimdilik» saıasatyn ustanýdy jalǵastyratyn bolady. Osy saladaǵy jumys tsıfrlandyrý jáne avtomattandyrý arqyly ishki sybaılas jemqorlyq táýekelderin barynsha azaıtýǵa  shoǵyrlanatyn bolady.

«Bizdiń túpki maqsatymyz - dıplomatııalyq qyzmetti tsıfrlyq formatqa tolyǵymen kóshirý jáne memlekettik qyzmetterdi avtomattandyrý, osylaısha adam faktorynyń múmkin yqpalyn joıatyn bolamyz», - dedi Qaırat Ábdirahmanov.

Onyń aıtýynsha, basym mindet SІM men shet elderdegi mekemelerdiń arasynda biryńǵaı aqparattyq ortany qurý bolyp tabylady, bul ózara is-qımyldyń tıimdiligin aıtarlyqtaı arttyryp, ishki rásimderdi jeńildetedi.

Vedomstvo dıplomatııalyq qyzmet organdaryn jetildirýdi, kadrlyq saıasatty júıeleýdi jáne retke keltirýdi jalǵastyratyn bolady.

Qazaqstandyqtardyń BUU men EQYU sııaqty halyqaralyq qurylymdarǵa qatysýyn keńeıtý mańyzdy mindet bolyp qala bermek, bul halyqaralyq kún tártibin qalyptastyratyn bedeldi ǵalamdyq ınstıtýttarda Qazaqstannyń múddelerin ilgeriletý men qorǵaýdyń eń tıimdi ádisi bolady.

Mınıstr osy mindetti ulttyq deńgeıge kóterý arqyly sheshýge bolatyndyǵyn atap ótti. Al, kadrmen qamtamasyz etý máselesin sheshýde «Bolashaq» baǵdarlamasyn, Bilim mınıstrligin, elshilikterdi jáne Qazaqstannyń halyqaralyq uıymdardyń janyndaǵy turaqty ókildikterin tarta otyryp sheshýdi usyndy.