Qaırat Ábdirahmanov Qazaqstannyń BUU Qaýipsizdik keńesindegi basymdyqtaryn atady

ASTANA. QazAqparat - QR Syrtqy ister mınıstri Qaırat Ábdirahmanov Reseı Syrtqy ister mınıstri Sergeı Lavrovpen kelissózderdiń qorytyndysyna oraı ótken baspasóz máslıhatynda elimizdiń BUU Qaýipsizdik keńesindegi basymdyqtary jaıynda aıtyp berdi, dep habarlaıdy QazAqparattyń Máskeýdegi tilshisi Medet Ahmetov.

«Birikken Ulttar Uıymynda bizdiń eki qujatymyz resmı tirkeldi. Onyń biri Prezıdent Nazarbaevtyń ótken jyldyń kókteminde Vashıngtonda ótken ıAdrolyq qaýipsizdik jónindegi sammıtte jarııa etken «Álem. 21 ǵasyr» manıfesi. Taıaýda ǵana Prezıdent Nazarbaev Qaýipsizdik keńesi múshelerine óziniń saıası joldaýymen júgindi. Onda Qaýipsizdik keńesindegi Qazaqstan Respýblıkasynyń basymdyqtary aıqyndalǵan», - dep ata ótti  Ábdirahmanov.

Osy rette mınıstr Qazaqstannyń BUU QK músheligi kezindegi aǵymdaǵy kúntártibine toqtaldy.

«Eń aldymen  bul ıadrolyq qarýdan azat álem qurýǵa jaqyndatý. Kelesi basymdyqtardyń biri  óńirlik jáne jahandyq deńgeıdegi qarýly qaqtyǵystardyń aldyn alý jáne toqtatý. Bul basymdyqtardy júzege asyrý úshin biz jumystyń túrli tásilderin qoldanatyn bolamyz», - dedi Qazaqstan SІM basshysy.

Ábdirahmanov óz sózinde Qaýipsizdik keńesi múshesin saılaý barysynda Qazaqstannyń tabysqa jetý sebebin de  atap ótti.

«Biz Afrıka qurlyǵy tarabynan keńinen qoldaý aldyq. Qaýipsizdik keńesi kún tártibiniń 70 paıyzǵa jýyǵy Afrıkaǵa qatysty beıbitshilik pen qaýipsizdik máselesin quraıtyndyǵyn eskersek, Afrıkadaǵy beıbitshilik pen damý BUU-daǵy qazaqstandyq delegatsııanyń turaqty nazarynda bolady», - dedi ol.

Sonymen qatar Qazaqstan SІM basshysy soǵystar men qaqtyǵystardyń aldyn alý, adam quqyǵyn qorǵaý, turaqty damýǵa qol jetkizý, klımattyń ózgerýimen kúres máselelerinde elimizdiń seriktesterimen birlese jumys isteıtindigimizdi basa aıtty.