Qaırat Ábdirahmanov grýzııalyq áriptesimen kezdesti
ASTANA. QazAqparat - Búgin elordada QR Syrtqy ister mınıstri Qaırat Ábdirahmanov Grýzııa vıtse premer-mınıstri - Syrtqy ister mınıstri Mıhaıl Djanelıdzemen kezdesti, de habarlaıdy QazAqparat tilshisi.
«Grýzııa barlyq ýaqytta da óziniń dástúrli qonaqjaılylyǵymen, jomarttyǵymen erekshelenedi. Bizdiń elderimizdiń arasyndaǵy saıası, iskerlik ahýal dástúrli dostyq, baýyrlastyq qarym-qatnyasymyzdy tereńdetýge, keńeıtýge múmkindik beredi. Bul qalyptasqan dástúrge ne bolmasa hattamaǵa sáıkes aıtyla salatyn bos sóz emes»,- dep atap ótti Qazaqstan Syrtqy ister mınıstri grýzııalyq áriptesimen kezdesý barysynda.
Sonymen qatar mınıstr Qazaqstan men Grýzııa óńir, jalpy álem elderi betpe-bet kelip otyrǵan túrli sıpattaǵy jańa syn-tegeýrinderge birlese qarsy turatyndyǵyn basa aıtty.
«Bul rette halyqaralyq kún tártibindegi barlyq negizgi máselelerde Qazaqstan men Grýzııanyń ustanymdary saı keletindigin atap ótken oryndy. Biz kóptegen halyqaralyq alańdarda da birgemiz. Múmkinshilikti paıdalana otyryp, Grýzııa táýelsizdiginiń qaıta qalpyna kelýiniń 100 jyldyǵymen quttyqtaımyn», - dedi Qaırat Ábdirahmanov.
Grýzııa Syrtqy ister mınıstri Mıhaıl Djanelıdze Qazaqstanǵa birneshe ret kelgenin atap ótti.
«Tamasha elderińizde, ǵajap qalalaryńyzǵa taǵy da kelý múmkinshiliginiń bolǵanyna qýanyshtymyn. Bul qalaǵa alǵash kelýim emes. Sondyqtan da barlyq ýaqytta qalalaryńyz ben elderińizdiń qarqyndy damyp kele jatqanyna qýanyshtymyn», - dedi ol.
