Qaırat Ábdirahmanov Germanııanyń Syrtqy ister memlekettik mınıstrimen kezdesti
ASTANA. QazAqparat - QR Syrtqy ister mınıstri Qaırat Ábdirahmanov Germanııanyń Syrtqy ister memlekettik mınıstri Nıls Annenmen kezdesti. Bul týraly búgin QR Syrtqy ister mınıstrligi baspasóz qyzmetiniń jetekshisi Aıbek Smadııarov aıtty, dep habarlaıdy QazAqparat tilshisi.
«Búgin Syrtqy ister mınıstri Qaırat Ábdirahmanov QR Prezıdenti Ákimshiliginde, Parlament Májilisinde jáne Syrtqy ister mınıstrliginde kelissózder júrgizý úshin Qazaqstanǵa kelgen Germanııanyń Syrtqy ister memlekettik mınıstri Nıls Annenmen kezdesti. Germanııanyń Memlekettik mınıstri Nıls Annen Germanııanyń Qazaqstandy Ortalyq Azııadaǵy syrtqy saıası jáne ekonomıkalyq belsendiliktiń basym baǵyty retinde qarastyratynyn aıtyp, Germanııany 2019-2020 jyldarǵa arnalǵan Birikken Ulttar Uıymynyń Qaýipsizdik Keńesiniń turaqty emes músheliginde qoldaǵany úshin alǵysyn bildirdi», - dedi ol.
Onyń aıtýynsha, óz kezeginde Qaırat Ábdirahmanov Qazaqstan men Germanııa arasyndaǵy qarym-qatynas damýdyń turaqty dınamıkasymen sıpattalatynyn jáne Qazaqstan men Eýropalyq Odaq arasyndaǵy seriktestik baılanystardy qalyptastyrýda Berlınniń mańyzdy rólin atap ótti.
«Kelissózder barysynda eki el arasynda ózara qarym-qatynastyń barlyq aýqymynda qol jetkizilgen yntymaqtastyqtyń strategııalyq sıpaty anyqtaldy. Bul turǵyda Qazaqstan Respýblıkasynyń Prezıdenti Nursultan Nazarbaev pen Germanııa Federatıvtik Respýblıkasynyń Federaldy Prezıdenti Frank-Valter Shtaınmaıer jáne Kantsleri Angela Merkel arasyndaǵy joǵary deńgeıde turaqty baılanys erekshe mańyzǵa ıe», -dedi Aıbek Smadııarov.
Onyń sózine qaraǵanda, taraptar ekijaqty saýda-ekonomıkalyq yntymaqtastyqtyń perspektıvalaryn jeke talqylap, Qazaqstan men Germanııa arasyndaǵy taýar aınalymynyń turaqty ósýin qanaǵattanarlyqpen atap ótti.
«Jalpy, ótken jyly qos memleket arasyndaǵy taýar aınalymy 4,9 mlrd AQSh dollaryna jetti. Investıtsııalyq yntymaqtastyqty tereńdetýde eleýli áleýettiń bar ekeni atap ótildi. 2017 jyly Germanııanyń Qazaqstan ekonomıkasyna salynǵan tikeleı ınvestıtsııasynyń jalpy aǵyny 345 mln AQSh dollarynan asty. Jalpy, 2005 jylǵy qańtardan 2018 jyldyń qańtaryna deıin Germanııadan Qazaqstanǵa quıylǵan tikeleı ınvestıtsııanyń jalpy aǵyny 4,2 mlrd AQSh dollarynan asty. Qazaqstan ekonomıkasyna quıylǵan nemis ınvestıtsııasynyń 90 paıyzdan astamy «shıkizattyq emes» salaǵa, atap aıtqanda, óńdeýshi ónerkásip, hımııa ónerkásibi, qurylys materıaldaryn óndirý, kólik jáne agroónerkásip keshenine baǵyttalyp otyr. Yntymaqtastyqtyń qoldanystaǵy jáne jańa ınstıtýttary arqyly ekijaqty baılanystyń damý qarqynynyń ósýine qoldaý kórsetý týraly ýaǵdalastyqqa qol jetkizildi», - dedi SІM ókili.
