Qaırat Ábdirahmanov Beıjińdegi Abaı eskertkishine gúl shoqtaryn qoıdy

ASTANA. QazAqparat - Búgin QR Syrtqy ister mınıstri Qaırat Ábdirahmanov, Qazaqstannyń Qytaıdaǵy Tótenshe jáne ókiletti elshisi Shahrat Nuryshev jáne qazaqstandyq dıplomattar men «Tszıntaı» mýzeıiniń qyzmetkerleri Beıjińniń «Chaoıan» ortalyq saıabaǵynda ornalasqan Abaı eskertkishine gúl shoqtaryn qoıdy, dep habarlaıdy QazAqparat agenttiginiń Qytaıdaǵy menshikti tilshisi.

Taǵzym etý rásiminen soń Beıjińdegi Abaı Qunanbaıuly bıýstiniń avtory, belgili qytaılyq músinshi ıÝan Sıkýn Qazaqstannan kelgen qonaqtar úshin  «Tszıntaı» mýzeıinde arnaıy eksýrsııa júrgizdi.

«QR Syrtqy ister mınıstri Qaırat Ábdirahmanovty óz mýzeıimizde kórgenimizge qýanyshtymyz. Biz Qazaqstan elshiligimen tikeleı baılanystamyz jáne óte jaqsy qarym-qatynastamyz. Elshilikpen birlesip, túrli mádenı sharalardy, kórmelerdi, «Abaı oqýlaryn», Abaıdyń týǵan kúnin ótkizemiz. Mundaı sharalar álemdik mádenıet qazynasy bolyp sanalatyn Abaı fılosofııasyn nasıhattaýǵa septigin tıgizedi», - dedi «Tszıntaı» mýzeıiniń dırektory Jo Hýa QazAqparat tilshisine bergen suhbatynda.
    

Eske sala ketsek, Beıjiń qalasyndaǵy Abaı músini 2014 jyldyń 19 naýryzynda Qytaıdaǵy QR elshiliginiń bastamasymen ornatylǵan bolatyn.

QR Syrtqy ister mınıstri Qaırat Ábdirahmanov Beıjińge ShYU-ǵa múshe memleketterdiń Syrtqy ister mınıstrleri keńesiniń kezekti otyrysyna qatysý úshin resmı saparmen keldi.