Qaırat Ábdirahmanov Astana protsesiniń kezekti kezdesýin qorytyndylady
«Astana protsesi aıasyndaǵy kelissózderdiń úshinshi kezeńi ótken naýryz aıynan beri Sırııada birneshe qaıǵyly oqıǵa oryn aldy jáne Sırııadaǵy ahýalǵa qysym aıtarlyqtaı kúsheıe tústi. Degenmen, Astana protsesiniń róli de aıtarlyqtaı artyp otyr. Sırııadaǵy ahýaldyń munan ary shıelenisýi esh taraptyń múddesine saı kelmeıdi. Ásirese dál qazirgi ýaqytta Astanada qol jetkizilgen soǵysty toqtatý rejimi men atalǵan kelisimmen baılanysty sharalar aıryqsha mańyzdy dep sanaımyz», - dep atap ótti mınıstr.
QR SІM basshysy óz sózinde Sırııa boıynsha Astana protsesiniń tórtinshi kezeńine kepilger elder tarabynan jáne múddeli barlyq taraptardyń ókilderinen joǵary deńgeıdegi jaýapty tulǵalar qatysqanyn atap ótti.
«Qazaqstan Respýblıkasy Astana protsesi aıasynda joǵary deńgeıdegi kelissózderdiń kelesi kezeńin ótkizý qurmetine ıe boldy. Ózderińiz de biletindeı, Astana protsesiniń bir ǵana maqsaty soǵys qımyldaryn toqtatý rejimin nyǵaıtyp, qoldaý kórsetý arqyly Sırııadaǵy qantógisti toqtatý bolyp sanalady. Biraq, Astanada qol jetkizilgen kelisimniń, eger ony qurmetti taraptarynyń batyldyǵy men Sırııada myǵym beıbitshilikke qol jetkizýdegi erik-jigeri bolmasa tıimsiz ekendigin moıyndaýymyz qajet. Biz barlyq ýaqytta da Sırııadaǵy áskerı stsenarııge jol bermeý kerektigine, ahýaldy tek beıbit jolmen sheshý qajettigine sendik», - dedi Qaırat Ábdirahmanov.
Ol Astana protsesiniń Jeneva protsesiniń ajyramas bóligi sanalatyndyǵyn basa aıtty. Qazaqstandyq taraptyń ustanymyna sáıkes, Jeneva BUU aıasynda Sırııa boıynsha kelissózderdi ótkizýdiń negizgi orny sanalady. Onda kún tártibiniń saıası bóligi talqylanady.
«Degenmen biz Jeneva protsesiniń tabysty bolýy Qazaqstan elordasyndaǵy kelissózderdiń nátıjesimen tyǵyz baılanysyp jatqandyǵyn túsinýimiz kerek. Bul turǵyda, janjaldasýshy taraptardyń soǵysty toqtatý týraly rejimdi saqtaýy jáne kepilger elderdiń ony qamtamasyz etýi mańyzdy dep sanaımyz. Astanada qol jetkizilgen barlyq kelisimder tek qaǵaz júzinde qalmaýy tıis. Eger biz álemdik qoǵamdastyq pen Sırııa azamattarynyń senimin saqtaǵymyz kelse naqty nátıjeler ákelý qajet. Barlyq qıyndyqtarǵa qaramastan Astana óziniń tuǵyrnama retindegi óziniń tıimdiligi men ózektiligin dáleldedi. Onda barlyq múddeli taraptar óz kózqarastaryn keń aýdıtorııaǵa bildire alady. Bárinen de eń mańyzdysy naqty qadamdar týraly kelisimge kelýde», - dedi Qazaqstannyń syrtqy saıasat vedomstvosynyń basshysy.
Aıta keteıik, buǵan deıin Astanada ótip jatqan ekikúndik kelissózderden keıin kepilger elder Reseı, Iran jáne Túrkııa Sırııada qaýipsiz aımaq qurý týraly memorandýmǵa qol qoıǵanyn habarlaǵan bolatynbyz. Astana protsesi qatysýshylarynyń kelesi kezdesýi shildede ótedi
