«Qaırat» 2025 jylǵy sýperkýbok ıegeri atandy
ASTANA. KAZINFORM - Búgin fýtboldan Qazaqstan sýperkýbogynda almatylyq «Qaırat» elordada «Aqtóbeden» basym túsip, sýperkýbok ıegeri atandy.
Byltyr almatylyq klýb el chempıony atansa, aqtóbelik komanda Qazaqstan kýbogyna qol jetkizdi. Eki komanda sýperkýbokta alǵash ret kezdesti.
Oıynnyń alǵashqy mınýtynda aqtóbelik komanda tizgindi óz qolynda ustaýǵa tyrysty. Odan keıin «Qaırat» ta qarsy shabýylǵa shyqty. Keıbir sátterde gol soǵatyn múmkindigin múlt jiberip alyp jatty.
Ekinshi kezeńde oıyn tizginin «Qaırat» óz qolynda ustaýǵa tyrysty. Nátıjesinde olardyń qatarynan 58-mınýtta Elder Santana gol soǵyp ketti.
Al 62-mınýtta almatylyq klýbtan Erkin Tapalov qyzyl qaǵaz alyp, alańnan qýylyp ketti.
Oıynnyń 70-mınýtynda «Qaırattyń» jas juldyzy Dastan Sátpaev alańǵa shyqty. Kezdesý barysynda ádemi oıyn órnegimen jankúıerler rızashylyǵyna bólendi.
Al 86-mınýtta almatylyq ujymnan Valerıı Gromyko qorytyndy esepti belgiledi.
Osylaısha «Qaırat» qarsylasyn 2:0 esebimen jeńip, sýperkýbokqa ıe boldy.
Qazirge deıin «Aqtóbe» 2008, 2010, 2014 jyldary úsh márte sýperkýbokty tóbesine kóterse, «Qaırat» 2016, 2017 jyldarda eki márte jeńimpaz atandy.
Aqtóbelik klýb ózi qatysqan sýperkýboktyń barlyǵynda jeńse, almatylyq komanda 2015, 2018, 2019, 2022 jyldary qarsylastaryna ese jiberip qoıdy
Sondaı-aq sýperkýbokke barlyǵy tórt komanda qol jetkizdi. Olardyń qatarynda «Astana» - 6, «Tobyl» - 2, «Shahter», «Ordabasy» men «Elimaı» - 1 márteden enshiledi.
Bıyl el birinshiliginiń alǵashqy týry 1-2 naýryz kúnderi ótedi. Dop dodasyna barlyǵy 14 komanda qatysady. Olardyń qatarynda «Qaırat» (Almaty), «Astana», «Aqtóbe», «Ordabasy» (Shymkent), «Tobyl» (Qostanaı), «Elimaı» (Semeı), «Atyraý», «Qaısar» (Qyzylorda), «Qyzyljar» (Petropavl), «Jeńis» (Astana), «Jetisý» (Taldyqorǵan), «Oqjetpes» (Kókshetaý), «Ulytaý» (Jezqazǵan) komandalary bar.
Alǵashqy týrda «Qyzyljar» men «Jetisý», «Astana» men «Qaırat», «Ordabasy» men «Aqtóbe», «Turan» men «Oqjetpes», «Atyraý» men «Elimaı», «Qaısar» men «Jeńis», «Tobyl» men «Ulytaý» kezdesedi. Sońǵy týr oıyndary 26 qazanǵa belgilengen.