«Qaıraq» ótkizý pýnktinde júk kólikteriniń kezegi paıda boldy
ASTANA. KAZINFORM – Qostanaı oblysyndaǵy «Qaıraq» avtomobıl ótkizý pýnktinde júk kólikteri jınalyp qaldy. Buǵan ótkizý pýnktindegi jóndeý jáne rekonstrýktsııa jumystary, sondaı-aq maýsymdyq júk tasymalynyń artýy sebep bolǵan.
Qostanaı oblysy boıynsha Memlekettik kirister departamentiniń málimetinshe, ótkizý pýnktinen shyǵatyn aýmaqta júrgizilip jatqan jóndeý jumystaryna baılanysty qozǵalys jolaqtarynyń biri ýaqytsha jabylǵan. Sonyń saldarynan ótkizý múmkindigi tómendep, júk kólikteriniń kútý ýaqyty uzarǵan.
Buǵan qosa, maýsymdyq tasymal kóleminiń artýy da qosymsha júkteme týǵyzyp otyr. Atap aıtqanda, aýyl sharýashylyǵy jáne jemis-kókónis ónimderiniń, sondaı-aq kórshiles elderge baǵyttalǵan júkterdiń kólemi kóbeıgen.
– Ótkizý pýnkti shtattyq rejımde jumysyn jalǵastyryp jatyr. Departament qyzmetkerleri jaǵdaıdy baqylap, kólik quraldaryn rásimdeý men ótkizý jumystarynyń irkilissiz júrýi úshin tıisti sharalar qabyldap jatyr, – dep habarlady vedomstvodan.
Tasymaldaýshylardan baǵyttaryn josparlaý kezinde qalyptasqan jaǵdaıdy eskerip, múmkindik bolsa, basqa avtomobıl ótkizý pýnktterin tańdaý suraldy.
Aıta keteıik, Qazaqstanda 2025 jyly EAEO syrtqy shekarasyndaǵy 9 ótkizý pýnkti jańǵyrtyldy.
