Qaıraddın Baımahanov: Vırýspen kúresip júrgenderge qol ushyn sozyp, qıyndyqty birge eńseremiz
QYZYLORDA. QazAqparat - Elimizde áskerı mindettilerdi arnaýly jıynǵa shaqyrý týraly jarlyq - der kezinde qolǵa alynǵan oń sheshim. Memleket basshysy Qasym-Jomart Toqaev halqymyzdyń qaýipsizdigi men densaýlyǵyn qorǵaý baǵytynda naqty qadam jasady. Qyzylorda oblystyq «Aýǵan soǵysy ardagerleri uıymy» qoǵamdyq birlestiginiń tóraǵasy Qaıraddın Baımahanov QazAqparat tilshisine osylaısha óz pikirin bildirdi.
«Qazirgi tańda álem jurtshylyǵy syn sátti bastan keshirip otyr. Jer-jahannyń ár qıyrynda koronavırýs dertimen kúres júrgizilýde. Mundaı aýqymdy sharalar bizdiń elimizde de atqarylýda. Sondaı jaýapty kezeńde ortaq jumylyp, birlesken túrde kóptegen ıgilikti isterge jol ashýymyz tıis. Qashanda bir jaǵadan bas, bir jeńnen qol shyǵarǵanymyz óte oryndy. Osylaısha qaýipti keselmen kúres júrgizip jatqan azamattardyń orasan zor qyzmetine qol ushyn sozyp, qıyndyqty birge eńseremiz. Alda jarqyn ister jalǵasady. Ol beıbit kúnde birlik, tatýlyq, aýyzbirlik arqasynda keledi. Sondyqtan Qazaqstannyń árbir azamatynyń boıynda eljandylyq qasıet bolýy kerek dep oılaımyn», - deıdi Q.Baımahanov.
Onyń aıtýynsha, Qazaqstan jurtshylyǵy qaı kezde de qıyndyqty jeńip, jarqyn ómirge qol jetkizdi. Sol sebepti qaýipti halqymyz keselmen kúres barysynda da sondaı oń nátıjege qol sozady.
«Bul indetti joıý jolynda bizdiń aldymyzda turǵan mindetter nemquraılyq pen alańsyzdyqty keshirmeıdi. Osyndaı jaýapty kezeńniń salmaǵyn túsine otyryp, oǵan birge tosqaýyl qoıǵanymyz oryndy», - dedi ol.
