Qaınar Oljaı taýar qaptamalaryndaǵy qatelermen kúresýdiń jolyn aıtty
«90 jyldardyń ortasynda Ekonomıka mınıstrligi sheshim qabyldap, kez kelgen zattyń, taýardyń qazaqsha aýdarmasy, túsiniktemesi bolýy kerek degen jaqsy ereje qalyptastyrdy. Bul ultqa paıdaly edi, biraq zııan bolyp shyqty. Kásiporyndar qazaqsha aýdarmaǵa nemketti qaraıdy. Dúkennen kez kelgen zatty alyp qarańyz, árip qatesin, sóılemniń qurylymdyq qatesin aıtpaǵanda, qazaqtyń uǵymynda joq sózderdi tabýǵa bolady. Budan qutylýdyń joly bar», - dedi jýrnalıst Astanada ótken «Jańǵyrý 3.0: Rýhanı jańǵyrý» konferentsııasynda.
«Esterińizde bolsa, 90 jyldary emshiler kóbeıip ketti. Sonda «Respýblıkalyq emshiler qaýymdastyǵynyń» kýáligi bar adamdar ǵana emdeýge qaqyly degen ereje shyǵardyq. Demek, taýar qaptamalaryndaǵy mátindi aýdarýǵa Ulttyq aýdarma bıýrosyna múshe bolǵan, kýáligi bar adamdar ǵana qaqyly deseńizder, myna bylyqtan shyǵar edik», - deıdi ol.
Jýrnalıst qurylǵanyna kóp bola qoımaǵan Ulttyq aýdarma bıýrosynyń aldynda úlken maıdan, úlken tolqyndar turǵanyn atap ótti jáne «Jańa gýmanıtarlyq bilim: qazaq tilindegi 100 oqýlyq» jobasyna zeınetke shyqqan jýrnalısterdi tartýdy usyndy.
«Qazirgi aqparat quraldary basshylarynyń oqýlyqty ádebı redaktsııalaýǵa ýaqyty bolmaıdy. Qyzmettegi jýrnalısterdiń de qoly tımeıdi. Sondyqtan oqýlyqtardy ǵylymı redaktsııalaýda ǵylymǵa qazaqy uǵymdar ákelgen antropolog Orazaq Smaǵul, Ábdimálik Nysanbaevtaı aqsaqaldardyń múmkindikterin paıdalaný kerek. Ádebı redaktsııalaýǵa Jarylqap Beısenbaı, Erjuman Smaıyl, Janbolat Aýpbaev syndy bir kezderi redaktor bolǵan aǵalardy tartý kerek. Olardyń birinshiden qoldary bos, ekinshiden - yjdahattary bar, úshinshiden - tájirıbeleri jetkilikti», - deıdi Q.Oljaı.
