Qaıyrymdylyqqa qarajat jınaý: zańǵa ózgerister engiziledi
ASTANA. KAZINFORM — Qaıyrymdylyq qarajatyn jınaýdyń ashyqtyǵyn qamtamasyz etý maqsatynda zańnamaǵa tıisti túzetýler ázirlenip jatyr. Bul týraly Mádenıet jáne aqparat mınıstri Aıda Balaeva málim etti.
— Memleket basshysy azamattyq qoǵam salasynda basym mindetterdiń biri retinde memlekettik áleýmettik tapsyrys krıterıılerin qaıta qaraý jáne úkimettik emes uıymdar týraly jańa zań ázirleý máselesin aıqyndady. Bul baǵytta zań jobalaryn ázirleý boıynsha jumys algorıtmi ázirlenip, azamattyq qoǵam ókilderiniń qatysýymen jumys toptary quryldy, — dedi Aıda Balaeva elordada ótken ardagerler keńesiniń plenýmynda.
Búginde úkimettik emes uıymdardyń qyzmeti úsh zańmen retteledi:
— «Qoǵamdyq birlestikter týraly» zań;
— «Kommertsııalyq emes uıymdar týraly» zań;
— «ÚEU-ǵa arnalǵan memlekettik áleýmettik tapsyrys, granttar men syılyqaqylar týraly» zań.
— Atalǵan zań úkimettik emes uıymdardyń qaǵıdattary men qyzmet etý tetikterin qamtıdy, halyqaralyq tájirıbe men azamattyq qoǵamnyń usynystary eskerilip, ázirlenedi. Sizderdiń uıym da úkimettik emes uıym bolǵandyqtan, atalǵan zań jobasyn ázirleýge belsene qatysýǵa shaqyramyn, — dep vedomstvo basshysy el ardagerlerine úndeý joldady.
Sondaı-aq mınıstr úkimettik emes sektordy memlekettik qarjylyq qoldaýdyń negizgi tetikteriniń biri — memlekettik áleýmettik tapsyrys ekenin aıta kele, jyl saıyn elimizde 2 myńnan astam áleýmettik joba júzege asatynyn tilge tıek etti.
— Degenmen, bul baǵytta da zaman talabyna saı júıeli ózgerister engizý kerek. Osy baǵyttaǵy jumys tobynyń alǵashqy otyrysy kúni keshe ótti, negizgi tásilder aıqyndaldy. Aldaǵy ýaqytta zań jobalary boıynsha jarııa talqylaýlar júrgiziledi. Qaıyrymdylyq qarajatyn jınaýdyń ashyqtyǵyn qamtamasyz etý maqsatynda zańnamaǵa tıisti túzetýler ázirlenip jatyr, — dedi Aıda Balaeva.
Eske salaıyq, ótken jyly Mádenıet jáne aqparat mınıstri Aıda Balaeva qaıyrymdylyq kómek mehanızmderin jetildirý qajettigin qozǵaǵan bolatyn.
Aıta ketsek, byltyr Joǵary aýdıtorlyq palatasynyń tóraǵasy Álıhan Smaıylov elimizde memleket qurǵan nemese memlekettiń qatysýymen nemese memlekettiń belgili bir fýnktsııalary berilgen qorlarǵa aýdıt júrgizýdi usyndy.
Búgin elordada respýblıkalyq ardagerler uıymy keńesiniń kezekti plenýmy ótti. Oǵan elimizdiń barlyq óńirinen ardagerler keńesiniń tóraǵalary qatysty.