Qaıyrymdylyqqa aqsha jınaǵan blogerler salyq organdaryna esep beretin bolady

Úkimettiń baspasóz ortalyǵynda Qarjy vıtse-mınıstri Erjan Birjanov qaıyrymdylyq maqsatta aqsha jınaıtyn blogerlerdiń mobıldi aýdarymdary qalaı qadaǵalanatynyn aıtty, dep Kazinform.

«Búginde blogerlerdiń kóbi kásipker retinde tirkelmegen. Olar áleýmettik jelide tikeleı efır arqyly utys oınatyp, qaıyrymdylyq qoryna aqsha jınaıdy. Olardyń mobıldi aýdarymy tekserile me?» - dep surady jýrnalıst.

Erjan Birjanov mundaı maqsatta jasalǵan aýdarymdar da «100 aýdarym» qaǵıdaty boıynsha salyq organdarynyń nazaryna iligetinin aıtty.

«Tek blogerler ǵana emes, basqa azamattar da osylaı aqsha jınaýy múmkin. Bul qarajat balanyń emine arnalsa jáne mobıldi aýdarym sany 100-den assa, endigi jyly bizge ol týraly tıisti málimet túsedi. Sodan biz bul azamatqa arnaıy habarlama jiberemiz. Azamat nemese bloger «Iá, men qańtar, aqpan, naýryzda osyndaı aqsha jınaǵan edim. Kásipkerlik maqsatta emes, aqshany osy baǵytta jumsadym. Jiberilgen aqshanyń rekvızıti bar» dep ózine aýdarylǵan aqshanyń qandaı maqsatta jumsalǵanyn túsindirip berýge tıis. Mundaı jaǵdaıda oǵan adamǵa suraq týyndamaıdy, salyq mindeti qoıylmaıdy. Aqsha jınaıtyn adam qarjyny ne úshin jınap jatqanyn naqty bilýi tıis. Eger kásipkerlik nemese jarnama bolsa, salyq mindettemesi bolady. Qaıyrymdylyqqa jınalsa, adam eshqandaı jaýapkershilikke tartylmaıdy, salyq tólemderi paıda bolmaıdy», - dedi vıtse-mınıstr.