Qaıyrymdylyq uıymdarynyń biryńǵaı tizilimi jasalady
ASTANA. KAZINFORM — Senatta «QR keıbir zańnamalyq aktilerine tsıfrlandyrý, derbes derekterdi qorǵaý, jol júrisi jáne kóliktegi ozyq tehnologııalardy retteý máseleleri boıynsha ózgerister men tolyqtyrýlar engizý týraly» zań maquldandy.
Jańa zań jol ınfraqurylymyn basqarýdy jáne jol qaýipsizdigin tsıfrlandyrýdy, kóliktegi ozyq tehnologııalardy zańnamalyq retteýdi, sondaı-aq kıberqaýipsizdikti nyǵaıtý men jeke derekterdi qorǵaýdy damytýǵa baǵyttalǵan. Sondaı-aq qaıyrymdylyq uıymdarynyń biryńǵaı memlekettik tizilimi jasalady.
Senator Amangeldi Esbaıdyń aıtýynsha, bul úshin QR Jer kodeksine, Kásipkerlik kodeksine, Eńbek kodeksine, Ákimshilik rásimdik-protsestik kodeksine, Áleýmettik kodeksine jáne Bıýdjet kodeksine, sondaı-aq qoldanystaǵy zańdarǵa ózgerister men tolyqtyrýlar engiziledi.
— Eń aldymen kólik zańnamasyn jetildirý sheńberinde pılotsyz kólik quraldary men áýe mobıldigin damytýdy (aerotaksı) retteý jáne avtojol salasyn odan ári damytý boıynsha zańnamalyq túzetýler usynylǵan. Pılotsyz kólik quraldaryn paıdalanýdy retteıtin zańnamalyq aktilerge «pılotsyz avtokólik quraly», «pılotsyz áýe kemesi», «pılotsyz temirjol kóligi quraly» apparattyq uǵymdary engiziledi jáne buǵan ınfraqurylymdy qalyptastyrý, pılotsyz kólik quraldaryn qoldaný tártibin anyqtaýǵa qatysty normalar qarastyrylǵan, — dedi Senat depýtaty.
Kólik júrgizýge medıtsınalyq qarsy kórsetilimderi bar azamattardyń medıtsınalyq derekterin (dıagnozdy ashpaı) Іshki ister mınıstrliginiń tsıfrlyq derekqoryna ıntegratsııalaý, jol erejelerin buzýdy tirkeıtin kameralardy jedel járdem kólikteri men avtobýstarǵa ornatý normalary usynylǵan.
Sonymen birge kólik júrgizýshilerin daıarlaý jónindegi oqý uıymdarynyń qyzmetine memlekettik baqylaý engizý jáne avtomektepter jumysyna ruqsat berý tártibin jáne osyndaı ruqsat alý úshin talaptardy engizýge jáne aqparattyq júıe arqyly oqý protsesterin qadaǵalaý úshin oqý uıymdarynyń reestrin jasaý qarastyrylǵan.
— Ulttyq qaýipsizdik organdarynyń asa mańyzdy tsıfrlyq nysandar kıberqaýipsizdigin qamtamasyz etý talaptarynyń saqtalýyna memlekettik baqylaý júrgizý ókilettikteri keńeıtiledi. Eńbek zańnamasy jumys berýshilerdiń qyzmetkerlerdi kıberqaýipsizdik talaptarymen tanystyrý, olardyń laýazymdyq mindetterinde belgileý jáne atalǵandardyń saqtalýyna ishki baqylaý júrgizýdi mindetteıtin normalarmen tolyqtyrylǵan, — deıdi Amangeldi Esbaı.
Sondaı-aq, derbes derekter ıdentıfıkatorlary, derekterdi búrkemeleý jáne heshteý, derbes derekterdi jınaıtyn jáne óńdeıtin tulǵalardyń tizilimi sııaqty jańa uǵymdar engiziledi.
Tsıfrlyq nysandardan derbes derekterdi bólek faıldarǵa nemese tsıfrlyq tasymaldaǵyshtarǵa tıisti kelisimsiz kóshirýge tyıym salý, derbes derekter qaýipsizdiginiń buzylý reestrin engizý, óńdeletin derekter kólemine qaraı derbes derekterdiń menshik ıeleri men operatorlaryn synyptaý kózdeledi.
— Qoǵamdyq tártipti bakylaý, qylmyspen kúresý jáne azamattardyń qaýipsizdigi úshin Ulttyq beınemonıtorıng júıesi engiziledi. Memlekettik qaıyrymdylyq tsıfrlyq platformasy jáne qaıyrymdylyq uıymdarynyń tizimin qalyptastyrýǵa, kóshi-qon qaýipsizdigin kúsheıtýge jáne shekaranyń tsıfrlyq júıelerin korǵaýǵa arnalǵan normalar usynylǵan, — dedi senator.
Buǵan deıin Senat sot oryndaýshylar jaýapkershiligin arttyrý týraly zańdy maquldaǵan edi.
