Naýryznama onkúndiginde 69 qaıyrymdylyq is-shara uıymdastyryldy
ASTANA. KAZINFORM – Jalpyulttyq Naýryznama onkúndigi aıasynda Qaıyrymdylyq kúnine oraı Qazaqstannyń túrli óńirlerinde áleýmettik turǵydan osal toptardy qoldaýǵa jáne qoǵamda qaıyrymdylyq mádenıetin nyǵaıtýǵa baǵyttalǵan aktsııalar ótti.
Mádenıet jáne aqparat mınıstrliginiń baspasóz qyzmetiniń málimetinshe, is-sharalar Shymkent qalasynda, sondaı-aq Abaı, Jetisý, Ulytaý, Pavlodar, Qaraǵandy, Jambyl, Qostanaı, Aqmola, Túrkistan, Mańǵystaý oblystarynda jáne birqatar qala men aýdandarda uıymdastyryldy. Jalpy sany 69 is-shara ótkizilip, olarǵa 1 395 adam qatysty. Aktsııalar barysynda az qamtylǵan jáne kópbalaly otbasylarǵa, jalǵyzbasty qarttarǵa jáne tyl ardagerlerine naqty kómek kórsetildi.
Aktsııalar aıasynda muqtaj jandarǵa azyq-túlik sebetteri tabystalyp, turǵyn úılerdiń aýlasy men mańaıyndaǵy aýmaqtardy qardan tazalaý jumystaryna qoldaý kórsetildi. Sonymen qatar qaıyrymdylyq kontsertteri uıymdastyrylyp, odan túsken qarajat áleýmettik qoldaýǵa muqtaj azamattarǵa baǵyttaldy.
Іs-sharalarǵa jastar uıymdary, volonterlik qozǵalystardyń ókilderi jáne memlekettik mekemelerdiń qyzmetkerleri belsendi túrde qatysty.
Ótkizilgen bastamalar qoǵamda qaıyrymdylyq mádenıetin nyǵaıtýǵa, volonterlik qozǵalysty damytýǵa, sondaı-aq meıirim, janashyrlyq jáne aǵa býynǵa qurmet kórsetý qundylyqtaryn dáripteýge yqpal etti.
Budan buryn Naýryznama aıasynda áskerı qyzmetshiler qaıyrymdylyq aktsııasyn ótkizgenin jazǵan edik.
Sondaı-aq qazaq túsinigindegi qaıyrymdylyq qandaı ekenin myna materıaldan oqýǵa bolady.