Qaıyrymdylyq qorlary BAQ-ta esep jarııalaýǵa mindetteledi

ASTANA. KAZINFORM – Qazaqstanda qaıyrymdylyq uıymdarynyń qyzmetine qoıylatyn talaptardy kúsheıtý josparlanyp otyr. Bul týraly Mádenıet jáne aqparat vıtse-mınıstri Qanat Ysqaqov málim etti.

– Qaıyrymdylyq týraly zańǵa birneshe baǵyt boıynsha ózgerister engiziledi. Birinshiden, azamattardy qaıyrymdylyq kómek kórsetýge yntalandyrý kózdelip otyr. Ekinshi másele, jarııalylyq pen eseptilik qamtamasyz etý. Barlyq qaıyrymdylyq uıymy esebin buqaralyq aqparat quraldarynda jarııalaýǵa mindetti bolady, - dedi Qanat Ysqaqov Úkimet úıinde ótken baspasóz máslıhatynda.

Vıtse-mınıstrdiń aıtýynsha, búginde tıisti ózgeristerdi ázirleýmen aınalysatyn jumys toby quryldy.

Eske salsaq, ótken jyly Mádenıet jáne aqparat mınıstri Aıda Balaeva qaıyrymdylyq kómek mehanızmderin jetildirý qajettigin aıtqan edi. 

Sondaı-aq qaıyrymdylyq qory basqarý shyǵynyn qalaı esepteýi kerektigi týraly jazǵan edik.