Qaıyrymdylyq, kontsertter men jobalar: Dımash aldaǵy josparymen tanystyrdy
ASTANA. KAZINFORM – Dımash Qudaıbergen kelesi aıda mansabyndaǵy eń iri kontsertin ótkizbek. Bul týraly óner juldyzy Astanada ótken baspasóz konferentsııasynda habarlady.
Dımash jaqynda kontsertine daıyndalý úshin Nıý-Iorkke attanbaq.
– 5 qazan kúni Madison Square Garden-de alǵashqy jeke kontsertimdi beremin. Kontsertterge qatysty kóp josparym bar, – dep jaýap berdi ol Kazinform tilshisiniń suraǵyna.
Qaıyrymdylyq jobalary týraly kóp aıtpasa da, Dımash mundaı josparlardyń bar ekenin rastady.
– Qaıyrymdylyqqa qatysty kóptegen josparlarym bar, biraq ony aıta bergim kelmeıdi. Eger osy oıymyzdy úlgi retinde júzege asyra alsaq, sol kezde mindetti túrde bólisemin. Qazir sol josparlarǵa tolyq senimdi bolýym kerek, sosyn ǵana tyńdarmanǵa aıtamyn. Qaıyrymdylyq – bul kontsertterden bólek nárse. Bul – Qudaımen ózińniń ishki áńgimeń. Eger men qaıyrymdylyq istesem, ony júregimmen, janymmen jasaımyn, — dedi ónerpaz.
Dımash Qudaıbergen Selın Dıon men Stıvı Ýander syndy álemge áıgili mýzykanttarmen jumys istegisi keletinin aıtty.
– Men kóptegen ártistermen istes boldym. Mysaly, ol tizimde Andrea Bochellı, Lara Fabıan, Assıf Domıngos, Hose Kaneles, Djekı Chan jáne Qytaıdyń kóptegen juldyzdary bar. Árıne, Selın Dıon men Stıvı Ýandermen de jumys isteýdi armandaımyn. Eger olar bul oıymmen kelisse, men úshin úlken qurmet bolar edi. Ózim týraly kóp oılamaımyn. Biraq mundaı ańyz tulǵalarmen bir sahnada óner kórsetý men úshin asqan mártebe, – dedi ol.
Alaıda qazirgi ýaqytta Dımash óziniń bar nazaryn «Voice Beyond the Horizon» jobasyna salyp jatqan kórinedi jáne onyń qatysýshylaryn barynsha qoldaýǵa tyrysyp jatqanyn jetkizdi.
– Men jas urpaqqa bar múmkindikti jasaýǵa tyrysyp júrmin. Onyń ishinde Qazaqstannan bizdiń telejobamyzǵa qatysyp, tamasha nátıje kórsetken Oljas ta bar. Bul jumysty ári qaraı jalǵastyramyn. Osy jobadan keıin ózin-ózi basqaratyn taǵy bir halyqaralyq uıym paıda bolady dep úmittenemin, – dep túsindirdi óner ıesi.
Aıta keteıik, Dımash Qudaıbergen men Qytaıdyń Hunan Broadcasting System kompanııasymen birlese júzege asyryp jatqan halyqaralyq televızııalyq joba Qazaqstannyń týrıstik áleýetin álemdik aýdıtorııaǵa tanystyryp jatyr.