Qaıyrhan Tutqyshbaev soltústik pen shyǵys óńirlerdi gazdandyrý josparymen bólisti

— Qostanaı oblysynda gazben qamtamasyz etilgen eldi mekender bar. Qazir Qartaly-Rýdnyı-Qostanaı gaz qubyry jumys istep tur. Yrǵyz, Torǵaı óńirlerine qatysty jergilikti atqarýshy organdarmen jumys istep, tıisti qarajat esebinen jalǵastyramyz. Ol jaqqa magıstraldy gaz qubyrlary kelip tur. Shyǵys Qazaqstan óńiri jaıynda aıtar bolsam, bul máseleni 2 tarappen sheshemiz. Birinshi jospar boıynsha Qytaı men Reseı arasyndaǵy kelissózder nátıjesinde gaz qubyry shyǵys óńirimiz arqyly tartylsa, onda Shyǵys Qazaqstan men Abaı oblystarynyń búkil aýdanyn kógildir otynmen qamtýǵa múmkindik bolar edi, — dedi vıtse-mınıstr Májilistiń jalpy otyrysynan keıin.

Alaıda, ol bul kelissózder Qytaı men Reseı arasynda ǵana ótip jatqanyn, oǵan Qazaqstan qatyspaıtynyn atap ótti.

— Soltústik óńirler boıynsha ótken jyly Reseımen Sankt-Peterbýrg qalasynda memorandýmǵa qol qoıdyq. Birinshi gaz 2030 jyly Esil-Astana jobasy aıasynda kelýi múmkin. Bul — Astanadan Kókshetaý qalasyna, Kókshetaýdan Petropavl qalasyna deıin tartylatyn qubyr. Joba iske asqanda soltústik óńirler tolyqqandy gazben qamtylady, — dedi Qaıyrhan Tutqyshbaev.

Osydan buryn vıtse-mınıstr elimizde 700 myń tonnaǵa deıin dızel otyny tapshylyǵy bar ekenin aıtty.