Qaıyńdyǵa jol, Kólsaıǵa qatynaıtyn elektromobılder jáne turaq: jobalar qalaı júzege asyp jatyr
QONAEV. KAZINFORM – Almaty oblysyndaǵy tanymal týrıstik baǵyttardyń biri – Kólsaı jáne Qaıyńdy kólderi. Týrısterdiń qaýipsizdigin kúsheıtý maqsatynda qandaı jobalar qolǵa alyndy, ınfraqurylymy qalaı damıdy Kazinform agenttiginiń tilshisi anyqtap kórdi.
Qaıyńdyǵa aparatyn jol
Qaıyńdy kóline jańa jol salý máselesi kópten beri aıtylyp keledi, ásirese atalǵan joba 2023 jyldyń kúzinde Qaıyńdy-Saty taýly jolynda jolaýshylar mingen avtobýs ÝAZ kóligimen soqtyǵysqan qaıǵyly jaǵdaıdan keıin qyzý talqylanyp jatyr.
Jol 2024 jyly salynatyny belgili boldy.
Alaıda joba áli júzege asyrylǵan joq. Týrıster kúni búginge deıin eski ÝAZ kólikterimen qatynaýǵa májbúr.
Almaty oblystyq týrızm basqarmasynan atap ótkendeı, Qaıyńdy kóline asfalt jolynyń qurylysy sonaý 2019 jyly jerge ornalastyrý jobasyn ázirleý men memlekettik aktini alýdan bastalǵan.
Jobalyq-smetalyq qujattary bekitilip, qurylys-montajdaý jumystarynyń quny - 1,2 mlrd teńgege baǵalandy.
Bas merdiger «BS Build» kompanııasy 2021 jyly 10 shaqyrym ýchaskeni jóndeýge kiristi. Oǵan 190 mln teńge bólindi.
Alaıda, 2022-2023 jyldary jobalyq-smetalyq qujattamany qaıta esepteýge jáne qujattardy memlekettik saraptamaǵa daıyndaýǵa baılanysty jumys ýaqytsha toqtatyldy. 2024 jyly jobalyq-smetalyq qujattamanyń quny qaıta eseptelip, 2,4 mlrd teńge boldy.
– 2024 jyldyń 27 qazanynda bas merdiger Almaty qalasynyń aýdanaralyq ekonomıkalyq sotyna tapsyrys berýshi «Jolaýshylar kóligi jáne avtomobıl joldary basqarmasy» MM-niń ústinen talap aryzben júgindi. 2025 jyldyń 8 qańtarynda kelisimniń bolmaýyna jáne 2023 jyldan bastap qarajat bólinbegendikten sot merdigermen kelisimshartty buzý týraly sheshim shyǵardy, – dep atap ótti basqarmadan.
Qazir bul nysannyń jobalyq-smetalyq qujattamasyn 24 589 355 teńgege qaıta esepteý josparda. Esepteý aıaqtalǵannan keıin onyń naqty quny anyqtalady.
Qaıyńdy kóline jańa jol salynǵanan keıin týrıster jeke kólikterimen qatynaı ala ma
– Qazir týrısterge jeke kólikterimen Qaıyńdy kóline deıin barý shektelgen. Kólikterin arnaıy turaqqa qaldyrady. Bul sheshim kóldiń ekologııasyn qorǵaý jáne onyń biregeı tabıǵatyn saqtaý qajettiliginen týyndap otyr. Sonymen qatar, kólikterdiń qosymsha aǵyny keptelisterge ákelip, týrısterdiń jaılylyǵyna áser etedi. Bolashaqta bul tájirıbe qorshaǵan ortaǵa tıgizetin áserdi barynsha azaıtý jáne ınfraqurylymnyń shamadan tys júktelýine jol bermeý úshin saqtalýy múmkin,– dep jaýap berdi basqarmadan.
Infraqurylymdy jaqsartý
2024 jyly Almaty oblysynyń týrızm basqarmasy Qaıyńdy kóline aparatyn uzyndyǵy 425 metr jaıaý júrginshiler jolyn abattandyrý jumystaryn aıaqtady. Bul jumystar «Kólsaı kólderi» memlekettik ulttyq tabıǵı parkiniń aýmaǵynda ınfraqurylymdy jaqsartý jáne týrısterdiń kólge jaıly ári qaýipsiz barýyn qamtamasyz etý maqsatynda júrgizildi.
Kólsaıǵa elektromobılmen barady
– Saty aýylynda týrıster jeke kólikterin, týrfırmalar avtobýstaryn qoıatyn úlken avtoturaq uıymdastyrý jobasy boıynsha baıqaý jarııalanady. 2023 jyly 1,5 gektar jerge turaq salýǵa jobalyq-smetalyq qujattama ázirlendi. Jobanyń jalpy quny -10 mln teńge. Barlyq qajetti qarajat bólinip, merdiger «Qorǵan geodezııa» jaýapkershiligi shekteýli seriktestigimen kelisim-shart jasaldy. Avtoturaqtyń smetalyq quny - 394,3 mln teńge. Byltyr memlekettik saraptamadan oń qorytyndy alyndy. Qazir joba oblystyq memlekettik satyp alý basqarmasy arqyly tenderge shyǵarylýda, – delingen jaýapta.
Jaqyn arada týrısterdi Kólsaı kóline tasymaldaý úshin elektromobılderdi shyǵarý múmkindigin qarastyrý josparlanyp otyr. Bul másele boıynsha sheshim avtoturaq qurylysy aıaqtalǵannan keıin qabyldanady. Atalǵan jobany qarjylandyrýǵa ınvestorlar tartý kózdelgen. Biraq, 2025 jyly velosıped, samokattarǵa jeke jol salý josparda joq. Degenmen, aldaǵy ýaqytta bul másele ınfraqurylymdy odan ári jetildirý jáne barlyq jol qozǵalysyna qatysýshylarǵa qolaıly jaǵdaı jasaý aıasynda qarastyrylatyn bolady.
Jýynatyn bólmeler
«Kólsaı kólderi» ulttyq park aýmaǵynda 11 sanıtarlyq-gıgıenalyq qondyrǵy ornalasqan, onyń 6-ýi Tómengi Kólsaı kólinde, 5-ýi Qaıyńdy kólinde. Qazir sý qubyrynyń qatyp qalýyna baılanysty tómengi Kólsaı kóli baǵytynda ornalasqan sanıtarlyq-gıgıenalyq qondyrǵynyń ekeýi ǵana jumys istep tur.
2024 jyly Kólsaı kólderin tamashalaýǵa qansha týrıst keldi
Týrızm basqarmasynyń málimetinshe, byltyr «Kólsaı kólderi» ulttyq tabıǵı parkine 395 386 adam tartylsa, onyń 6 712-si sheteldik týrıster. Salystyrmaly túrde aıtsaq, 2023 jyly parkke 244 733 týrıst kelse, onyń 3 331-i sheteldikter.
2021 jyly «Kólsaı kólderi» tabıǵı parki ıÝNESKO-nyń Búkilálemdik jelisine engizilgen bolatyn.
Osyǵan deıin, Almaty oblysynda týrıster sany rekordtyq kórsetkishke jetkeni týraly jazǵan edik.