Qaıyńdy kóline aparatyn joldyń qurylysy 2,5 mlrd teńgege baǵalanyp otyr

QONAEV. KAZINFORM — Almaty oblysy Kegen aýdanynyń ákimi Nurbaqyt Teńizbaev Kazinform agenttiginiń tilshisine Qaıyńdy kóline aparatyn jol qurylysy týraly aıtyp berdi.

Qaıyńdy kóline jańa jol salý máselesi kópten beri aıtylyp keledi, ásirese atalǵan joba 2023 jyldyń kúzinde Qaıyńdy-Saty taýly jolynda jolaýshylar mingen avtobýs ÝAZ kóligimen soqtyǵysqan qaıǵyly jaǵdaıdan keıin qyzý talqylanyp jatyr. 

Jol 2024 jyly salynatyny belgili boldy.

Aýdan ákiminiń aıtýynsha, qazir Qaıyńdy kóline deıingi 12 shaqyrym jol qurylysynyń jobalyq-smetalyq qujattamasy aıaqtaldy.

— 12 shaqyrym joldyń 10 shaqyrymyna joba ázirledikdaıyndadyq. Sondaı-aq jeke ınvestor basqaratyn avtoturaq salý josparda. Qujattar máslıhattyń qaraýyna jiberildi. Oblys ákimi ózi qoldap otyr. Qurylystyń jalpy quny —2,5 mlrd teńgege baǵalanyp otyr, — dedi Nurbaqyt Teńizbaev.

Aýdan basshysynyń sózinshe, jol qurylysy osy jyly bastalady. Budan bólek, elektr jelisin tartý josparda. Ázirge joba ázirlenip jatyr.

— Elektr jelilerine keletin bolsaq, bul jobany júzege asyrýǵa oblystyq bıýdjetten qarjy bólinip qoıǵan. Qazir jobalyq-smetalyq qujattamany daıyndap jatyrmyz. Bul biraz ýaqytty alady. Jumys aıaqtalǵannan keıin qujattar memlekettik saraptamadan ótedi. Jobaǵa sáıkes, uzyndyǵy 46 shaqyrym — Jalaǵash aýylynan Kólsaıǵa deıin elektr jelisin tartý qarastyrylǵan, — dedi Nurbaqty Teńizbaev.

Sonymen qatar, aýdan basshysy jeke ınvestor esebinen Kólsaı kólinde elektr qýatyn óndirý jobasy qarastyrylyp jatqanyn atap ótti. Qýattylyǵy 2 megavatt shaǵyn sý elektr stansasyn salýǵa ýákiletti organdardan qajetti ruqsat qujattary alyndy.

— Bul elektr qýatynyń kólemi aýmaqty turaqty energııamen qamtamasyz etýge jetedi. Biraq, árıne, bul bir kúnniń isi emes. Jumys bastalyp ketti, joba daıyn, qarajat bólindi. Barlyǵyn júzege asyrý úshin bizge ýaqyt kerek. Ózderińiz bilesizder, bul óńirde týrızm buǵan deıin sońǵy jyldardaǵydaı qarqyndy damymaǵan. Mysaly, byltyr Kólsaı kóline 400 myńǵa jýyq adam kelgen, bul joǵary kórsetkish, — dedi Nurbaqty Teńizbaev.

Osyǵan deıin týrısterdiń qaýipsizdigin kúsheıtý maqsatynda qandaı jobalar qolǵa alynǵany týraly jazǵan edik.

Sondaı-aq Almaty oblysynda Kóshpendiler qalashyǵyna jol salynatyny týraly jazǵan bolatynbyz.