Qaıyńdy kóline aparatyn jańa jol qashan qoldanysqa beriledi
QONAEV. KAZINFORM — Almaty oblysynda Qaıyńdy kóline aparatyn aýdandyq mańyzy bar jolynyń qashan qoldanysqa beriletini belgili boldy.
Oblys ákimdiginiń málimetinshe, bıyl tamyz aıynda jańa jolmen avtokólikter júre bastaıdy. Qazirgi tańda órge qaraı baǵyttalǵan oıly-qyrly jol tegistelip, endi asfalt tóseý jumysy qarqyn alǵan.
Búginge deıin jol boıyndaǵy 42 (100%) sý ótkizgish qubyr tolyq ornatylyp, 2,5 shaqyrym jol asfalttaldy. Joldyń jalpy uzyndyǵy — 10 shaqyrym bolady. Joba ótken jyldyń qazan aıynda bastaldy. Jalpy quny — 2,43 mlrd teńge.
— Joba óńirdegi kólik ınfraqurylymynyń talapqa saı bolýyna, jol sapasynyń jaqsarýyna septigin tıgizedi. Jańa jol paıdalanýǵa berilgennen keıin Qaıyńdy kóline qatynaý edáýir jeńildeıdi. Bul óńirge keletin týrıster sanynyń artýyna oń yqpal etedi, — dep habarlady ákimdikten.
Eske salaıyq, Qaıyńdy kóline aparatyn jol qurylysy birneshe jyldan beri talqylanyp keldi. Bul máselege 2023 jyly «Qaıyńdy — Saty» taý jolynda bolǵan jol apatynan keıin erekshe nazar aýdaryldy. Ol kezde jolaýshylar mingen avtobýs ÝAZ avtokóligimen soqtyǵysqan bolatyn.
Qazir týrıster Almaty oblysynyń eń kórikti oryndarynyń birin kórý úshin áli de jol talǵamaıtyn kóliktermen qatynaýǵa májbúr. Olar joldyń bir bóligin eski ÝAZ kólikterimen eńserip, qalǵan bóliginde jaıaý júredi.
2025 jyldyń jazynda Kegen aýdanynyń ákimi Nurbaqyt Teńizbaev Qaıyńdy kóline baratyn joldyń jobalaý-smetalyq qujattamasy ázirlengenin aıtqan edi.
