Qaıym Muhamedhanulynyń 110 jyldyǵy: ǵalym murasyn dáriptegen konferentsııa ótti

«Kókeıkesti ádebıettaný: poetıka, janr, stıl jáne Qaıym Muhamedhanulynyń ǵylymı murasy» atty is-sharaǵa belgili qazaqstandyq jáne sheteldik ǵalymdar, Abaı shyǵarmashylyǵyn zertteýshiler, ǵylymı jáne bilim berý uıymdarynyń ókilderi qatysty.

Konferentsııa aıasynda Qaıym Muhamedhanulynyń ǵylymı murasy, onyń abaıtaný ǵylymynyń damýyna qosqan úlesi, mátintaný, ádebıettaný, Abaı men Shákárim shyǵarmashylyǵyn zertteý máseleleri, sondaı-aq ulttyq ádebıet pen tarıhty zertteýdiń ózekti baǵyttary talqylandy.

L. N. Gýmılev atyndaǵy EUÝ fılologııa fakýlteti qazaq ádebıeti kafedrasynyń oqytýshysy, PhD Láılá Demesinova ǵalym murasyna qatysty pikirin bildirdi. Onyń sózinshe, Qaıym Muhamedhanuly Abaı shyǵarmalaryna tekstologııalyq turǵydan alǵash bolyp zerttegen. Ǵalymnyń 1951 jyly shyqqan «Abaıdyń aqyn shákirtteri» degen dıssertatsııasy keıingi abaıtanýshylarǵa azyq boldy.

— Bul konferentsııaǵa tek qana Qazaqstannan emes, shetelden de myqty ǵalymdar óz baıandamalaryn usynyp jatyr. Ǵarıfolla Esim, Tursyn Jurtbaı, Saýytbek Abdarhmanov t. b. beldi ǵalymdar baıandama jasady. Taǵy bir eskertetin dúnıe, bul — halyqaralyq konferentsııa. Sondyqtan Qazan federaldyq ýnıversıtetiniń professory Flıýra Saıfýllına Qaıym Muhamedhanulynyń zertteýleri boıynsha baıandama jasady. Sondaı-aq, Ózbekstandaǵy Naýaı atyndaǵy ýnıversıtet professory Uzaq Joraqulov «Eki dostyń taǵdyry» degen maqalasyn oqyp berdi. Odan bólek, AQSh-tyń Montano ýnıversıtetiniń professory Andre Erno da sóz sóılep, zertteýin kópshilik nazaryna usyndy. Atalǵan baıandamalardyń barlyǵy Qaıym Muhamedhanulynyń eńbegine qatysty. Bul qazaq ǵalymynyń tek otandyq qana emes, álemdik ádebıettaný paradıgmalary negizinde de zerttelip jatqanyn ańǵartady, — dedi Láılá Demesinova.

Aıta keteıik, buǵan deıin de Qaıym Muhamedhanulynyń ǵylymǵa sińirgen orasan eńbegi jóninde jazǵanbyz.