Qaıǵyly tikeleı efır: Tatar qyzy óz ólimin vıdeoǵa túsirdi
ASTANA. QazAqparat - Feısbýk jáne ınstagram jelileriniń jańa fýnktsııasyna saı, kez kelgen adam tikeleı efırde halyqtyń qoıǵan suraǵyna jaýap bere alady. Áleýmettik jelilerdegi selfıden keıingi «juqpaly» ádet osy bolsa kerek.
Biraq, tikeleı efırdi qaı ýaqytta jáne qaı jerde iske qosýdyń qarapaıym qaýipsizdik erejelerin de umytpaǵan abzal. Tikeleı efırde kólik júrgizemin dep, ajal qushqan tatar qyzynyń taǵdyry kesheden beri áleýmettik jelide kópti oılandyra bastady, dep habarlaıdy QazAqparat.
Qazan qalasynyń turǵyny, jas qyz 23 naýryz kúni tańerteń kólik júrgizip kele jatqanda tikeleı efırge shyqqan. Qazan qalasynyń memlekettik jol qaýipsizdik ınspektsııasynyń aqparatyna súıensek, júrgizýshi qyz joldyń qarsy betine shyǵyp ketip, jolaýshylar avtobýsyna soqtyǵysqan.
Jol apaty Qazan-Dýbıazy tas jolynda oryn alǵan. 22 jastaǵy B.Sıtora esimdi qyz tikeleı efırge shyǵyp, «Sálem. Qaıda júrsizder, ne istep jatyrsyzdar, qaıda bara jatyrsyzdar?» dep áńgimeni bastaǵan. Sol arada kelgen hattardyń birine kóz aýdarǵan Sıtora joldyń qarsy betine shyǵyp ketkenin baıqamaı qalǵan. Rýlge ıe bola almaǵan ol jolaýshylar avtobýsyna soqtyǵysqan. Dárigerler boıjetkenniń ómirine arasha túse almady. Al, avtobýsta otyrǵan bes jolaýshy men júrgizýshi aýrýhanaǵa tústi.
