Qaıǵyly jaǵdaıdan keıin Almaty metrosynda ne ózgeredi

ALMATY. KAZINFORM – Almaty ákimi Erbolat Dosaev kózi nashar kóretin jas jigittiń óliminen keıin metropolıtende qandaı sharalar qoldanylatynyn aıtty.

Ol qalanyń qazirgi ınfraqurylymy ınklıýzıvti standarttarǵa sáıkes kelmeıtinin málimdedi.

– Vagon aralyq keńistikti jabý úshin platformalyq týrnıketter ornatylady. Bul másele ınklıýzııaǵa ǵana emes, sonymen qatar balalarymyzdyń qaýipsizdigine de qatysty. Bul jumystar 2025 jyldyń basynda júzege asyrylady. Jańa metro stantsııalaryn jobalaý kezinde bul standarttar mindetti bolady, – dep túsindirdi ákim.

Eske salaıyq, buǵan deıin Almaty metrosynda zaǵıp jolaýshy relske qulap, mert bolǵanyn jazǵanbyz.

Keıin «Abaı» metro beketinde bolǵan qaıǵyly oqıǵanyń beınejazbasy áleýmettik jelide tarady.