Kaıdzen fılosofııasy: ózgeris kishkentaı qadamnan bastalady
ASTANA. KAZINFORM - Búgingi ózgerister tolqynynda uıymdy alǵa jeteleıtin eń mańyzdy resýrs – tehnologııa emes, adam. Qyzmetkerlerdiń quzyrettiligi men yntasy, úırenýge ázirligi jáne úderisterdi jaqsartýǵa umtylysy strategııanyń qanshalyqty tıimdi bolatynyn belgileıdi.
Osy ıdeıany Kaıdzen fılosofııasy erekshe atap kórsetedi. Bul – úzdiksiz jaqsartý júıesi, onda adam eń basty nazarda. Kaıdzen ár qyzmetkerdiń qundylyǵyn kórýge, bastamalardy damytýǵa jáne úderisterdi birtindep ári júıeli túrde jetildirýge úıretedi.
Kaıdzen fılosofııasy Astanada ótken Medıtsınalyq tehnologııalar jáne aqparattyq júıeler ortalyǵy (MTAJO) uıymdastyrǵan eki kúndik trenıngtiń negizine alyndy. Oqytý QR Prezıdenti Іs basqarmasy Medıtsınalyq ortalyǵynyń basqarý jáne saraptamalyq baǵyttaǵy qyzmetkerlerine arnap ázirlendi.
Trenıngtiń birinshi kúni Kaıdzenniń álemdik metodologııalardyń biri bolýyna sebep bolǵan qaǵıdalardy túsinýge arnaldy. Qatysýshylar fılosofııa tarıhyn zerdelep, onyń tanymal bolý sebepterin talqylady jáne basty qaǵıdany qarastyrdy: jaqsartý tehnologııadan emes, adamnan bastalady.
Trenıng sapa men tıimdiliktiń — qyzmetkerlerdiń kúndelikti áreketteriniń nátıjesi ekenin kórýge kómektesti. Talqylaýlar men mysaldar arqyly qatysýshylar jeke bastamanyń jalpy kórsetkishterge áserin jáne nege qyzmetkerlerdiń belsendiligi nátıjeli strategııanyń negizi bolatynyn taldady.
Erekshe nazar jasyryn shyǵyndarǵa aýdaryldy. Dál osy shyǵyndar ujymdardyń damýyn jıi tejeıdi — jumysty baıaýlatady, sapany tómendetedi, eń bastysy qyzmetkerlerdiń motıvatsııasyn álsiretedi. Sondyqtan qatysýshylar tek shyǵyn túrlerin ǵana emes, óz tájirıbelerin beıneleıtin naqty jaǵdaılardy da qarastyrdy.
Birinshi kúnniń ekinshi bóliminde qatysýshylar Kaıdzendi álemdik standartqa aınaldyrǵan quraldarmen tanysty: Gemba, 5S, PDCA, standarttaý, «5 Nelikten». Basty oıdyń túıindisi: eger qyzmetkerler úderiste belsendi bolmasa, eshbir qural nátıje bermeıdi.
Naǵyz nátıje metodologııany iske asyratyn adamdar arqyly týady. Interaktıvti format tyńdaýshylarǵa quraldardy óz jumysyna beıimdeýge jáne olardyń jaýapkershilik pen komandalyq ózara árekettesý mádenıetin qalyptastyrýǵa qalaı áser etetinin kórýge múmkindik berdi.
Trenıngtiń ekinshi kúni tıimdi strategııa qyzmetkerlerdiń birlesken eńbegine negizdeletinin tolyq dáleldedi.
Qatysýshylar úderisterdi kartografııalaý arqyly qundylyq aǵynynyń kartasyn quryp, qyzmettiń negizgi kezeńderin taldap, úderisti jaqsartý boıynsha sheshimder izdedi. Komandalyq jumys ártúrli kózqarastardy, tájirıbelerdi jáne tásilderdi biriktirip, turaqty ózgeristerdiń negizin qalyptastyrdy.
Qorytyndy talqylaý joǵary deńgeıdegi qatysýdy kórsetti: tyńdaýshylar ıdeıalar usyndy, nátıjelerdi saralady jáne Kaıdzendi naqty jaǵdaıda qalaı qoldanýǵa bolatynyn talqylady.
Adamdar Kaıdzen fılosofııasyn, onyń ishinde ádisterdi jáne strategııany túsingen kezde ǵana naqty nátıjege jetkizetinin aıqyndady. MTAJO uıymdastyrǵan trenıng tek bilim berý úshin ǵana baǵyttalmaǵan, ol Kaıdzen fılosofııasy arqyly qyzmetkerlerdiń áleýetin ashýǵa, sapa mádenıetin qalyptastyrýǵa jáne adamı faktoryna negizdelgen strategııa qurýǵa qalaı kómektesetinin kórsetti.
Kaıdzen úlken ózgerister shaǵyn qadamdardan bastalatynyn úıretedi. Al bul qadamdardy jasaıtyn — yntaly, sanaly, belsendi adam.
«Kaıdzen» arqyly baspananyń baǵasyn 20-25 paıyzǵa arzandatýǵa bolatynyn jazǵan edik.