Qaıda qyzmet istesem de, kásibı bilikti komanda jınap júremin - Ómirzaq Shókeev
TÚRKІSTAN. QazAqparat - Búgin Túrkistan oblysynyń qurylǵanyna bir jyl tolýyna oraı uıymdastyrylǵan baspasóz máslıhatynda aımaq basshysy Ómirzaq Shókeev kadr tańdaýda qandaı krıterıılerge mán beretinin aıtyp ótti. Óńir basshysynyń aıtýynsha, maman tańdaýda eń bastysy - kásibı biliktiligine mán berý qajet, dep habarlaıdy QazAqparat tilshisi.
«Bireýler men týraly «jaqyndaryn, jerlesterin jumysqa tartady» dep oılaıdy. Shyndyǵynda ondaı eshteńe joq. Ony tekserseńizder de bolady. Men qyzmet istegen jerlerde ózim taǵaıyndaıtyn adamdardyń tizimin alyp, saraptama jasasańyzdar da bolady, bári shyǵady. Negizi men qaı jerde jumys istesem de, Qostanaı, Astana, Shymkentte bolsyn, kásibı biliktiligi joǵary komanda jınap júremin. Sebebi, ákimderde sondaı bilikti komanda bolýy kerek. Ár jerden, ár saladan»,- dedi Ómirzaq Shókeev.
Aımaq basshysy sondaı-aq, bir orynnan «qozǵalmaı» otyratyn basshylar týraly pikir bildirdi. «Bir salany uzaq jyldar boıy basqarý jemqorlyqqa bir qadam jol emes pe?» degen saýalǵa ákim tıisti jaýabyn berdi.
«Meniń ustanymymda «adam jıyrma, otyz jyl otyr, sondyqtan alyp tastaıyq» degen prıntsıp joq. Adam kásibı deńgeıi joǵary maman bolsa, óz salasynda taza jumys istese, bekerden-beker qyzmetten alyp tastaýǵa bolmaıdy. Qyzmet - adam ómiriniń nátıjesi, abyroıy, jan-jaǵyndaǵy halyqtyń aldyndaǵy óziniń deńgeıi. Sondyqtan tekten-tek, bostan-bos «jasy kelip qaldy» nemese «kóp otyrdy» dep jumystan alyp tastaý mende joq»,-dedi Ómirzaq Shókeev.
