Kaıa Kallas: EO Qazaqstanmen strategııalyq seriktestikti tereńdetýdi kózdeıdi
ASTANA. KAZINFORM – Eýropalyq odaq Qazaqstandy Ortalyq Azııadaǵy negizgi seriktes retinde qarastyrady jáne energetıka, saýda, ekologııalyq turaqtylyq pen bilim syndy mańyzdy salalardaǵy yntymaqtastyqty keńeıtýge daıyn. Bul týraly EO Joǵarǵy ókili Kaıa Kallas Silk Way telearnasyna bergen suhbatynda aıtty.

— Qazaqstan – Eýropalyq odaq úshin óte mańyzdy seriktes. Biz qarym-qatynasymyzdy, ásirese ekologııa, energetıka jáne saýda máselelerinde tereńdete alamyz, - dedi Kallas suhbat barysynda.
Ol EO-nyń jasyl jáne tsıfrlyq ekonomıkaǵa kóshýge qajetti mańyzdy shıkizatqa qyzyǵýshylyq tanytatynyn atap ótip, osy sektorlardy damytýdaǵy ózara múmkindikterge toqtaldy.
— Bizde tehnologııa men noý-hoý bar. Eýropa adamdar úshin de, ǵalamshar úshin de ınvestıtsııa salyp, jańa múmkindikter jasaýǵa daıyn, - dedi ol.

Kallas sondaı-aq energııany ártaraptandyrýdyń mańyzdylyǵyna toqtalyp, Qazaqstannyń buryn bir ǵana el resýrstaryna tym táýeldi bolǵanyn atap ótti.
— Energııa jetkizýde tepe-teńdikti jáne qaýipsizdikti qamtamasyz etý úshin birneshe seriktestiń bolýy mańyzdy, - dedi ol.
Jahandyq turaqsyzdyq jaǵdaıynda qaýipsizdik Eýrodaqtyń syrtqy saıasatynyń, onyń ishinde Ortalyq Azııamen qarym-qatynasynyń ortalyq baǵytyna aınaldy.
— Qaýipsizdiktiń óte kúrdeli jaǵdaıynda ómir súrip jatyrmyz. Sondyqtan qaýipsizdik máselesin mindetti túrde talqylaýymyz qajet, - dedi Kallas.

Sonymen qatar EO bilim berý, zertteý jáne Transkaspıı kólik dálizi men Erasmus+ alys-beris bilim baǵdarlamasyn qosa alǵanda ınfraqurylym salalarynda jan-jaqty yntymaqtastyqty qoldaıdy.
— Samarqanda ótetin EO-Ortalyq Azııa sammıtine daıyndalýdamyz. Onda saýda, energetıka jáne kólik baılanysyndaǵy ózara qatynastyń mańyzdy qorytyndysyn shyǵaramyz, - dedi ol.
Suhbat barysynda Kallas Ortalyq Azııada órkendep kele jatqan aımaqtyq yntymaqtastyqqa qoldaý bildirip, EO men Qazaqstannyń barynsha myǵym baılanysyna senimmen qaraıtynyn jetkizdi.
Aıta keteıik, búgin Qazaqstan Prezıdenti Eýropa odaǵynyń Syrtqy ister jáne qaýipsizdik saıasaty jónindegi Joǵarǵy ókili — Eýropalyq komıssııanyń vıtse-prezıdenti Kaıa Kallaspen kezdesti.