Kaıa Kallas AQSh-tan Ýkraınaǵa kómek kórsetýdegi «júktemeni bólisýdi» surady

ASTANA. KAZINFORM — Eýroodaq AQSh-tan Ýkraınaǵa kómektegi jaýapkershilikti bólisýdi talap etti, dep jazdy DW.

— Biz prezıdent Tramptyń Ýkraınaǵa kóp kólemde qarý jetkizý týraly málimdemesin quptaımyz, alaıda AQSh bul júktemeni bóliskenin qalaımyz, — dedi Eýroodaqtyń syrtqy saıasat jónindegi basshysy Kaıa Kallas Brıýsselde EO-ǵa múshe memleketterdiń syrtqy ister mınıstrleriniń kezdesýinen keıin.

«Eger siz qarý berýge ýáde berip, ony basqa bireý tóleıdi dep oılasańyz, onda shyn máninde qarý bergenge sanalmaıdy», — dep keltiredi AFP agenttigi Kallastiń Donald Trampqa arnaǵan sózin.

AQSh prezıdenti buǵan deıin Eýropa elderimen birlesip Ýkraınaǵa Patriot zenıttik-zymyran keshenderin, úlken kólemdegi qarý men áskerı tehnıkany jaqyn arada jetkizýge ýáde bergen bolatyn. Alaıda bul mıllıardtaǵan dollar turatyn qarýdy eýropalyq NATO elderi satyp alýy tıis, delingen Tramp pen NATO bas hatshysy Mark Rıýtte usynǵan kelisimde.