Qaı juldyznama ıeleri qylmys jasaýǵa beıim - Qaraǵandy túrmelerinde erekshe zertteý júrgizildi
QARAǴANDY. QazAqparat - Qaraǵandy oblysy boıynsha qylmystyq-atqarý júıesi departamenti kolonııalarda erekshe zertteý júrgizdi, dep habarlaıdy QazAqparat tilshisi.
QAJD qyzmetkerleri penıtentsıarlyq mekemelerdiń psıhologtarymen jáne mamandarymen birlesip, sottalǵandardyń tórt myńǵa jýyq jeke isin taldady. Osylaısha «balyqtar» belgisimen týǵan adamdar qylmysqa beıim degen qorytyndyǵa keldi.
Qylmysqa jıi baratyn sottalýshylar arasynda «bıkesh» zodıak belgisinde týylǵandar ekinshi orynda, úshinshi orynda «toqty», odan keıin «taýeshki», «egizder», «arystan», «torpaq», «shaıan», «sýquıǵysh», «saryshaıan» jáne «tarazy». Qaraǵandy kolonııalaryndaǵy eń azy «mergen» boldy.
AK-159/17 mekemesiniń bastyǵy Bolat Muhtarovtyń aıtýynsha, zertteý barysynda belgili bir zodıak belgileri jazasyn ótep jatqan qylmystar da zerttelgen.
- Kisi óltirgeni úshin jazasyn óteýshiler arasynda «torpaq» pen «toqtylar» kóp. Zorlaý qylmysy úshin sottalǵandardyń arasynda kóbine «shaıandar» kezdesedi, sondaı-aq osy sanatqa «arystandar» jáne «taýeshkiler» kiredi. Sońǵylary alaıaqtyq pen esirtki saýdasymen baılanysty qylmystarda da baıqalady. Urlyq jasaǵandar arasynda «toqtylar», «arystandar» jáne «torpaqtar» kóp. Sondaı-aq, «balyqtar» men «arystandar» alaıaqtyqqa beıim, - deıdi ádilet polkovnıgi Bolat Muhtarov.
Sonymen qatar, tonaý qylmysy úshin, negizinen, Qaraǵandy oblysynyń kolonııalarynda «toqtylar» jáne «taýeshkiler» otyr. Buzaqylyq pen vandalızm «taýeshki», «toqty» jáne «balyqtar» arasynda jıi kezdesedi.
«Arystandar» men «balyqtar» zańsyz ań aýlaýdy jón kóredi. «Sýquıǵysh» belgisiniń ókilderi arasynda bopsalaýshylar kóp kezdesetini anyqtaldy.
