Qaı jas sportshylar 2028 jylǵy Olımpıadada top jarýy múmkin
ASTANA. KAZINFORM – Qazir halyqaralyq jarystarda kózge túsip, eresekter arasynda ózin dáleldeı bastaǵan otandyq jas sportshylarymyz bar. Kazinform agenttiginiń tilshisi aldaǵy tórtjyldyqtyń basty dodasynda júldege talasa alatyn jas órenderge sholý jasady.
Buǵan deıin 2030 jylǵy qysqy Olımpıada oıyndarynda Qazaqstanǵa medal ákelýi múmkin jas sportshylar týraly jazǵan edik.
Bul joly 2028 jyly Los-Andjeleste ótetin jazǵy Olımpıadada júlde úshin talasýǵa áleýeti jetetin jas qazaqstandyq sportshylar týraly sóz qozǵaımyz.
Osydan on jyl buryn 2016 jylǵy Rıo Olımpıadasynda qazaqstandyq júzýshi Dmıtrıı Balandın altyn medal jeńip alyp, álem jurtshylyǵyn tańǵaldyrǵan edi. Kópshilik mundaı nátıje kútpegenimen, qazaqstandyq jankúıerler Balandınniń Olımpıadaǵa jeńiske úmitkerlerdiń biri retinde barǵanyn jaqsy biletin. Ol kezde álem chempıonattarynyń júldegeri bolmasa da, 2014 jylǵy jazǵy Azııa oıyndarynda kórsetken nátıjeleri London Olımpıadasynyń chempıondary tirkegen ýaqyttarmen shamalas, tipti keıbirinen joǵary bolǵan.
Ázirge júzý sportynda 2028 jylǵy Olımpıadada Dmıtrıı Balandın sekildi álemdi tańǵaldyryp, Qazaqstannyń senimin aqtaıtyn jas talant baıqalmaıdy. Degenmen basqa sport túrlerinde halyqaralyq deńgeıde ózin tanytyp úlgergen, eresekter arasyndaǵy bedeldi jarystarda jarqyraı bastaǵan jas talanttardyń jańa legi qalyptasyp keledi. Olar aldaǵy Olımpıadada joǵary nátıje kórsetýge negizgi úmitkerlerdiń qatarynda.
Semserlesý
Qazaqstandyq jas semserlesýshi aldyńǵy býynnan bir úlken artyqshylyǵy bar. Olar álemdik reıtıngtiń kóshbasshylarymen komandalyq jarystarda turaqty túrde synǵa túsip, tájirıbe jınap keledi. Erler quramasy qazir álemniń úzdik segiz komandasynyń qatarynda bolǵandyqtan, jas sportshylar Kırıll Prohodov, Erlik Sertaı, Nıkıta Jýlınskıı jáne Aleksandr Fedotov Frantsııa, Italııa jáne Vengrııa sekildi elderdiń Olımpıada chempıondarynda óner kórsetip, joǵary deńgeıdegi básekeni meńgerip otyr. Munyń nátıjesi de baıqala bastady.
20 jastaǵy Kırıll Prohodov – semserlesý tarıhyndaǵy eń jas talanttardyń biri. Ol 2026 jylǵa deıin jasóspirimder men eresekter arasyndaǵy álem jáne Azııa chempıonattarynda júldeli oryn alyp úlgerdi. Qazirdiń ózinde ony Olımpıada chempıondary úshin qaýipti qarsylas dep sanaıdy.
2026 jylǵy Azııa chempıonatynyń komandalyq fınalynda Qazaqstan quramasy Tokıo Olımpıadasynyń chempıondary ári Parıj Olımpıadasynyń kúmis júldegerleri bolǵan Japonııa quramasymen kezdesti. Sheshýshi sońǵy jekpe-jek dál Kırıllge senip tapsyryldy.
Prohodov japon quramasynyń kóshbasshysy, Parıj Olımpıadasynyń jeke syndaǵy chempıony Kokı Kannomen synǵa tústi. Ol Qazaqstan quramasynyń esebin saqtap, tipti aıyrmasyn ulǵaıtyp, komandasyna 45:40 esebimen altyn medal alyp berdi.
Kırıll Prohodov nebári 18 jasynda ulttyq qurama sapyna shaqyryldy. Tájirıbeli sportshylar Rýslan Kýrbanov, Elmır Alımjanov jáne Vadım Sharlaımovpen birge óner kórsetip, Qazaqstan tarıhyndaǵy eresekter arasyndaǵy álem chempıonatyndaǵy alǵashqy komandalyq júldeni jeńip aldy.
2026 jyly Astanada ótken álem kýbogy kezeńinde Nıkıta Jýlınskıı eresekter quramasynyń negizgi sapyna enip, komandanyń jartylaı fınalǵa deıin jetýine úles qosty. Fınal joldamasy úshin ótken kezdesýde qazaqstandyqtar álemniń ekinshi nómirli quramasy Frantsııaǵa ese jibergenimen, Nıkıta taktıkalyq turǵydan saýatty ári senimdi óner kórsetti.
Aleksandr Fedotov Jýlınskıı jáne Vadım Sharlaımovpen birge 2026 jylǵy álem kýbogynda eresekter quramasynyń negizgi oıynshylarynyń birine aınaldy. Qazaqstan quramasy jarysty álemdegi úzdik tórtinshi komanda retinde aıaqtady. Al qola medal úshin ótken tartysty kezdesýde Japonııa quramasyna 42:44 esebimen jol berdi.
Boks
19 jastaǵy Tórehan Sabyrhan osy ýaqytqa deıin jastar arasyndaǵy Azııa chempıonatynda tórt márte altyn medal jeńip aldy. Mundaı jetistik tipti boks mektebi qalyptasqan memleketterdiń ózinde sırek kezdesedi.
Chempıondyq júldeni Tórehanǵa Gennadıı Golovkınniń óz qolymen tabystaýy jas boksshy úshin umytylmas sát boldy. Mamandar buny qazaqstandyq bokstaǵy býyn sabaqtastyǵynyń aıqyn kórinisi dep baǵalady. Qazir Tórehan eresekter arasyndaǵy básekege beıimdelip, kásibı bokstaǵy alǵashqy jekpe-jekterinde de jeńiske jetip úlgerdi.
Ádette eresekter deńgeıine aýysý kez kelgen jas sportshy úshin ońaı bolmaıdy. Soǵan qaramastan Tórehannyń búgingi óneri onyń joǵary deńgeıdegi sheberligin kórsetip otyr. Sarapshylar ony aldaǵy jyldary Qazaqstan boksynyń jańa býynyn alǵa bastaıtyn, bolashaǵynan zor úmit kúttiretin sportshylardyń biri sanaıdy.
Aıta keteıik, Tórehan Sabyrhan 2025 jyly Ulybrıtanııanyń Lıverpýl qalasynda ótken eresekter arasyndaǵy álem chempıonatyna alǵash ret qatysyp, birden altyn medal jeńip aldy. 19 jasynda álem chempıony atanǵan qazaqstandyq boksshy qarqynyn joǵaltpaı, bapkerlerimen birge durys daıyndyq júıesin saqtaı alsa, 2028 jylǵy Olımpıadadaǵy basty jańalyqtardyń birine aınalýy ábden múmkin.
Nysana kózdeý
2026 jyldyń jazynda Germanııanyń Zýl qalasynda ótken jasóspirimder arasyndaǵy álem chempıonatynda Qazaqstannyń qyzdar quramasy tarıhı jetistikke qol jetkizdi. Eleonora Ibragımova, Marııa Gorýn jáne Mılana Papchıhına komandalyq synda el qorjynyna tarıhı altyn medal saldy.
Qazaqstandyq mergender Olımpıada baǵdarlamasyna kiretin trap jattyǵýynda 337 nysanany dál kózdep, AQSh pen Italııanyń myqty quramalaryn artta qaldyrdy.
2028 jylǵy Olımpıadaǵa deıin áli eki jyl bar. Osy ýaqyt aralyǵynda sportshylar men bapkerleri eresekter arasyndaǵy básekege tyńǵylyqty daıyndalyp, tájirıbe jınaqtaýǵa múmkindik alady.
Kúres (grek-rım jáne erkin kúres)
Sońǵy jyldary United World Wrestling (UWW) uıymdastyratyn jastar arasyndaǵy álem chempıonattarynda qazaqstandyq balýandar turaqty túrde joǵary nátıje kórsetip keledi.
Erkin kúresten 125 kelige deıingi eń aýyr salmaqta Edige Qasymbek 2025 jylǵy 20 jasqa deıingi jastar arasyndaǵy álem chempıonatynyń jeńimpazy atandy.
Al grek-rım kúresinen 55 kelige deıingi salmaqta Ishar Kýrbaev 23 jasqa deıingi jastar arasyndaǵy álem chempıony boldy. Ol Eýropa men Azııanyń myqty qarsylastarynan tehnıkalyq sheberligimen erekshelenip, altyn medal jeńip aldy.
Edige men Ishar jastar arasynda ózderin dáleldep, sport mamandarynyń nazaryn aýdartty. Endigi basty mindeti eresekter arasyndaǵy halyqaralyq jarystarda da osy qarqynyn saqtap, joǵary nátıjege qol jetkizý.
Kórkem gımnastıka
16 jastaǵy Aqmaral Erekesheva eresekter sanatyna aýysyp, qysqa ýaqyt ishinde joǵary deńgeıdegi nátıjelerimen kózge tústi. Ol sońǵy aılarda Qazaqstan chempıonatynda top jaryp, birneshe iri halyqaralyq týrnırdiń altyn júldesin jeńip aldy.
Aqmaraldyń jasóspirimder arasyndaǵy álem chempıony atanýy Qazaqstannyń kórkem gımnastıka tarıhyndaǵy aıtýly jetistik boldy. Óıtkeni buǵan deıin qazaqstandyq gımnast qyzdar álem chempıonattarynda altyn medal jeńip kórmegen edi. Ol jetistikke 11 jyldyq tynymsyz jattyǵýdyń arqasynda jetti.
Eresekter sanatyna ótkennen keıin de Aqmaral tájirıbeli qarsylastarynyń tasasynda qalyp qoıǵan joq. Kerisinshe halyqaralyq jarystarda jeńis tuǵyryna kóterile bastady. Eresekter arasyndaǵy Qazaqstan chempıonatynda top jarǵan ol keıin Afınada ótken halyqaralyq týrnırde 109,700 upaı jınap, altyn medal ıelendi.
Bishkekte ótken eresekter arasyndaǵy Azııa chempıonatynda Aqmaral shyǵyrshyqpen jattyǵý fınalynda qola júldege ıe boldy. Sondaı-aq Frantsııadaǵy Gran-prı kezeńinde de qola medal jeńip aldy.
Aıta keteıik, buǵan deıin, sportshylarǵa sapar shyǵyndaryn óteýge 2000 dollar kóleminde grant beriletinin habarlaǵan edik.
