Qaı jaǵdaıda Úkimet shekti baǵany belgileıdi

NUR-SULTAN. QazAqparat – QR Saýda jáne ıntegratsııa mınıstri Baqyt Sultanov qaı jaǵdaıda Úkimet azyq-túlikke shekti baǵany belgileıtinin aıtty, dep habarlaıdy QazAqparat tilshisi.

«Erekshe jaǵdaılarda májbúrli túrde naryqqa aralasýdyń ákimshilik tetigi bar, ıaǵnı shekti baǵany belgileý eskerilgen. Bul qadamǵa pandemııa bastalǵanda ótken jyly barýǵa májbúr boldyq. Ol kezde dúrbeleń tolqynymen barsha álemde baǵa sharyqtap ketti. Sondyqtan tıisti is-sharalar nátıjesin berdi, biz ishki naryqty azyq-túlikpen qamtamasyz ete aldyq, tapshylyq bolmady», - dedi onlaın rejımde halyq aldynda esep berýi kezinde Baqyt Sultanov.

Onyń aıtýynsha, vaktsınalaý arqasynda Qazaqstanda jáne álem elderinde ekonomıkalyq belsendilik birtindep qalpyna kelip jatyr.

«Endigi basty maqsat – naryqtyń durys básekelestik pen teńgerimdi baǵa qalyptasý tuǵyryna qaıta oralýy. Barsha protsestiń ashyqtyǵy zamanaýı saýda ınfraqurylymyn qurý arqyly qamtamasyz etiledi», - dedi Saýda mınıstr.