Qaı ýnıversıtettiń túlegi joǵary jalaqy alady
ASTANA. QazAqparat - Batys Qazaqstan ınnovatsııalyq-tehnologııalyq ýnıversıtetin bitirgen maman eń joǵary jalaqy alady. Bul týraly búgin Ortalyq kommýnıkatsııalar qyzmetindegi brıfıngte Bilim jáne ǵylym salasyndaǵy baqylaý komıtetiniń tóraǵasy Talǵat Eshenqulov aıtty, dep habarlaıdy QazAqparat tilshisi.
Otandyq joǵary oqý oryndarynyń bilim berý baǵdarlamalaryna júrgizilgen reıtıngtiń ekinshi kezeńiniń nátıjesin jarııa etken onyń aıtýynsha, reıtıng 4 krıterııge súıenip jasalǵan. Olar - túlekterdiń jumysqa ornalasý paıyzy jáne olardyń ortasha eńbekaqysy, baǵdarlama ózektiligi baǵasy, sonymen qatar túlekterge júrgizilgen saýalnama nátıjesi men jumysqa turý týraly derekter.
«Ózderińizge belgili, birinshi kezeńde 33 mamandyq boıynsha 784 bilim berý baǵdarlamasyna baǵalaý júrgizgen edik. Qazir sonyń ekinshisi júrgizildi. Búgingi tańda 31 mamandyq boıynsha 681 baǵdarlamany baǵalap shyqtyq. Eki kezeń ishinde JOO-ny bitirgen 6 myńǵa jýyq azamattan saýalnama aldyq», - dedi Talǵat Eshenqulov.
Onyń dereginshe, ýnıversıtetti aıaqtaǵan jyly jumysqa ornalasýdyń eń joǵary deńgeıin «Metallýrgııa» mamandyǵy kórsetken. Olardyń qatarynda Rýdnyı ındýstrııalyq ınstıtýty men O.Baıqońyrov atyndaǵy Jezqazǵan ýnıversıtetiniń túlekteri bar. Jumysqa ornalasýdyń 58%-yn «Sý resýrstary men sýdy paıdalaný» mamandyǵynyń túlekteri kórsetip otyr.
«Reıtıngtiń ekinshi kezeńinde salalyq sarapshylardy qatystyra otyryp, bilim berý baǵdarlamalarynyń mazmunyndaǵy alshaqtyqty baǵalaý jáne taldaý jumystary júrgizildi», - dedi ol.
Komıtet basshysynyń paıymynsha, JOO-lardyń negizgi qateligi - oqý baǵdarlamasynda teorııaǵa basymdyq beriledi. Osy rette túlektiń daıyndyq deńgeıine tikeleı baılanysty eńbekaqy krıterııi mańyzdy. Oqytýshylyq-professorlyq quramy myqty jáne saýatty baǵdarlamasy bar joǵary oqý ornyn bitirgen túlekter anaǵurlym báseke qabiletti ekenin taldaý kórsetken.
Joǵary eńbekaqy Batys Qazaqstan ınnovatsııalyq-tehnologııalyq ýnıversıtetiniń «Kólikti paıdalaný jáne júk qozǵalysy men tasymaldaýdy uıymdastyrý» mamandyǵy boıynsha tirkelgen. Al Qazaq tehnologııa jáne bıznes ýnıversıtetiniń «Jeńil ónerkásip buıymdarynyń tehnologııasy jáne qurastyrylýy» mamandyǵy eń tómen baǵalanady eken.
2018 jyldyń sońyna deıin Ulttyq kásipkerler palatasy 29 mamandyq boıynsha reıtıng daıyndaýdy josparlap otyr.
