Qaı sanattaǵy otbasylardyń balalary jazǵy demalyspen qamtylatyny belgili boldy
NUR-SULTAN. QazAqparat - Bilim jáne ǵylym mınıstri Kúlásh Shámshıdınova balalardy jazǵy demalyspen qamtý sharalaryn atady, dep habarlaıdy QazAqparat tilshisi.
«Jazǵy demalys sharalarymen áleýmettik az qamtylǵan otbasy balalarynyń 80 paıyzy, aıryqsha bilimge muqtaj balalardyń 82 paıyzy, ártúrli salada jetistikke jetken, oqýshylar men devıantty tárbıedegi balalardyń 90 paıyzy qamtylady dep josparlanyp otyr. Alaıda jergilikti atqarýshy organdardyń bergen málimetterine sáıkes, ótken jylmen salystyrǵanda Nur-Sultan qalasy men Túrkistan oblysynda jazǵy lagerler sany men oqýshylardyń demalyspen qamtylý jospary birshama tómen bolatyn. Osy otyrysqa daıyndyq barysynda ákimdikter osy máseleni qaıta qarap, qosymsha qarjy bólý týraly sheshim qabyldap otyr», - deıdi mınıstr Úkimet otyrysynda.
Onyń aıtýynsha, 961 myń bala qurylys otrıadtaryna, orman jáne kógaldandyrý jumystaryna tartylady.
«Mádenı-tanymdyq is-sharalardy da uıymdastyrý kózdelip otyr. Osy turǵyda «Rýhanı jańǵyrý» baǵdarlamasynda kórsetilgen baǵyttar negizinde tarıhı jáne mádenı baǵyttaǵy jumystar júrgiziledi. Balalardyń týǵan jerge súıispenshiligin oıatatyn «Kıeli Qazaqstan» jobasyna saı tarıhı oryndarǵa ekskýrsııalar uıymdastyrylady. Mıllıonǵa tarta bala «Qazaqstan - meıirimdilik mekeni», «Tabıǵatty aıalaıyq», «Jol qozǵalysyndaǵy ınspektor» sekildi sharalarǵa qatysady. «Aýylym - altyn besigim» baǵdarlamasy aıasynda áleýmettik jobalarǵa jumyldyrylady», - deıdi Kúlásh Shámshıdınova.
Eske sala ketsek, búgingi Úkimet otyrysynda Asqar Mamın Bilim jáne ǵylym mınıstrligine balalardyń jazǵy demalysyn joǵary deńgeıde uıymdastyrý úshin tıisti jol kartasyn ázirleýdi júktegen bolatyn.
