Qaı sanattaǵy azamattar karantınge oqshaýlanýy kerek

NUR-SULTAN. QazAqparat - QR Bas sanıtarlyq dárigeri Aıjan Esmaǵambetova COVID-19 ınfektsııasyn taratpaý maqsatynda «QR halqyn qaýipsizdikpen qamtamasyz etý sharalary týraly» jańa qaýly shyǵardy, dep habarlaıdy QazAqparat tilshisi.

«Infektsııanyń taralý sıpatyn eskere kele, shetelden kelgen azamattardy baqylaýdy jalǵastyramyz. Búginnen bastap, shet elderden kelgen barlyq turǵyndar laboratorııalyq zertteý júrgizý úshin 3 táýlikke deıin karantınge alynady. Infektsııa rastalǵan azamattar statsıonarǵa jatqyzylady. Teris nátıje shyqqandar - 11 kúnge úı karantınine oqshaýlanady», - dedi bas sanıtarlyq dáriger Ortalyq kommýnıkatsııalar qyzmetinde ótken brıfıngide.

Bul norma áýe kompanııalarynyń pılottaryna jáne lokomotıv brıgadalarynyń múshelerine, temirjol kóligimen tasymaldaý qyzmetimen aınalysatyndarǵa jáne avtokólikpen halyqaralyq júk tasymaldaıtyndarǵa qoldanylmaıdy. Olar turaqty mekenjaıy boıynsha telefon arqyly medıtsınalyq baqylaýda bolady.

«EAEO jáne Ózbekstan Respýblıkasynan temirjol jáne avtokólikpen kelgen azamattar 14 kún úı karantıninde bolýy tıis. Syrtqy ister mınıstrligimen kelise otyryp, Qazaqstanǵa kelgen dıplomattar men olardyń otbasy múshelerin mindetti testileýden ótkizý normasy qarastyrylýda», - dedi A. Esmaǵambetova.

Buǵan deıin A. Esmaǵambetova koronavırýs ınfektsııasynan qaıtys bolǵandardy jerleý algorıtmin túsindirgen edi.