Qaı otshashý túrlerine tyıym salynady – ІІM jaýaby

ASTANA. KAZINFORM — Іshki ister mınıstriniń orynbasary Sanjar Ádilov Jańa jyldy toılaý kezinde qandaı feıerverkter úshin aıyppul salynatynyn túsindirdi.

- Jańa jylǵa qatysty toqtalsaq, qoǵamdyq tártipti buzýǵa jol bermeý is-qımyldaryna erekshe ekpin qoıamyz. Munda zańdylyq pen tártip ústemdik etýi kerek. Aýlalardyń tazalyǵyn buzbaıtyn nemese basqa azamattarǵa qaýip tóndirmeıtin shaǵyn otshashýlarǵa eshqandaı kedergi joq. Degenmen, azamattardyń ómirine, densaýlyǵyna jáne múlkine qaýip tóndiretin, sondaı-aq aýlalardy lastaıtyn tyıym salynǵan otshashýlarǵa ákimshilik kodeks aıasynda jaza qarastyrylǵan, - dedi Sanjar Ádilov Parlament Májilisinde tilshiler suraǵyna jaýap bere otyryp.

Buǵan deıin habarlanǵandaı, Qazaqstanda IV klassqa jatatyn (qýatty) pırotehnıkalyq buıymdardy tek ІІM-niń lıtsenzııasy bar zańdy tulǵalar ǵana paıdalana alady.

Aıta keteıik, Nıderland parlamentiniń joǵarǵy palatasy 2026 jyldan bastap jeke tulǵalarǵa petardalar qoldanýǵa tolyq tyıym salý týraly sheshimdi maquldaǵanyn jazǵan edik.