Qaı organnyń memlekettik qyzmet kórsetý sapasy «5»-ke baǵalandy
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi memlekettik organdardyń qyzmet kórsetý sapasyn baǵalap shyqty, dep xabarlaıdy QazAqparat tilshisi.
«Aǵymdaǵy jyly 27 memlekettik organnyń qyzmet kórsetý jumysy tekserildi. Sondaı-aq ákimdikterdiń osy saladaǵy jumysy baǵalandy. Osylaısha, jalpy 100 upaıdyń ishinen ortasha baǵa 58 upaıdy qurady. Ortalyq memlekettik organdar 55 upaıdy ıelense, jergilikti atqarýshy organdar 59 upaıdy jınady. Eń joǵary upaı sany ádilet, energetıka mınıstrlikteri, Aqmola men Pavlodar oblystarynyń ákimdikteri jınady. Al eń tómen upaı ulttyq ekonomıka men aýyl sharýashylyǵy mınıstrlikteri, sondaı-aq Batys Qazaqstan men Atyraý oblystaryna tıesili», - dedi agenttiktiń memlekettik qyzmetterdi baǵalaý jáne qadaǵalaý basqarmasynyń basshysy Marat Baısalov búgin Astanada ótken baspasóz máslıxatynda. Atalǵan reıtıng saýalnamalardyń negizinde jasaldy.
Budan bólek, agenttik mamandary taǵy 50 memlekettik qyzmetke qoǵamdyq monıtorıng ótkizip, onyń nátıjesin jyldyń aıaǵyna deıin vedomstvonyń resmı saıtynda jarııalaýdy josparlap otyr.
Aıta keteıik, aǵymdaǵy jyly memlekettik organdar 111,8 mln. teńge kóleminde qyzmet kórsetti. Sonyń 57 paıyzy qaǵaz túrinde boldy.
