Qaı óńirlerge sý basý qaýpi tónip tur: TJM sý tasqynyna baılanysty jaǵdaıdy pysyqtady
ASTANA. KAZINFORM - Elde sý tasqyny kezeńine daıyndyq aldyn ala bastalǵan bolatyn. Qazirgi tańda josparlanǵan sý tasqynyna qarsy is-sharalardyń 92%-y oryndaldy.
Bul týraly búgin Tótenshe jaǵdaılar mınıstrliginiń Strategııalyq josparlaý jáne jedel basqarý ortalyǵynda eldegi sý tasqyny jaǵdaıyna baılanysty ótken májilis barysynda aıtyldy, dep habarlaıdy mınıstrliktiń baspasóz qyzmeti.
Jıyn barysynda sonymen qatar 1 naýryzdan bastap TJM-niń jedel sý tasqynyna qarsy shtaby jumys istep jatqany aıtyldy. Jaǵdaı táýlik boıy baqylaýda, barlyq qyzmetterdiń áreketi naqty ýaqyt rejıminde úılestiriledi.
Óńirlerde aýqymdy jumystar júrgizildi: bógender nyǵaıtyldy, ózen arnalary tazartyldy jáne tereńdetildi, drenaj júıeleri men kanaldar jóndeldi, sý ótkizý qurylystary jańartyldy.
Bul sharalar óz nátıjesin berdi:
- 234 eldi meken qorǵalǵan
- 736 eldi meken úshin sý basý qaýpi tómendetildi
- 1 242 sý tasqyny qaýpi bar eldi mekenniń 272-si úshin qaýip áli de saqtalyp otyr.
Ońtústik óńirlerde sý tasqynynyń belsendi kezeńi aıaqtaldy. Qazir sý tasqynynyń sharyqtaý kezeńi Batys Qazaqstan jáne Aqtóbe oblystarynda.
Aqmola, Soltústik Qazaqstan, Qaraǵandy, Shyǵys Qazaqstan, Qostanaı men Abaı oblystary baqylaýda.
Naýryz aıynyń basynan beri Abaı oblysynda jeke turǵyn úılerdi sý basýdyń 6 jaǵdaıy tirkeldi. Olar aýa temperatýrasynyń kúrt jylynýy men jaýyn-shashynnyń saldarynan bolǵan. Qazirgi tańda barlyq saldar joıyldy.
Avtojoldarda barlyǵy 22 sýdyń tasýy jáne 1 joldy sý shaıý faktisi tirkeldi . Qazirgi ýaqytta 5 jaǵdaı baqylaýda.
Jaǵdaı jerden de, áýeden de baqylaýda: 13 óńirde 29 áýeden barlaý júrgizilip, 196 eldi meken qamtyldy. Monıtorıng áli júrgizilip jatyr.
Sonymen qatar aldyn alý sharalary da qolǵa alynǵan:
- 7 mln m³-den astam qar shyǵaryldy
- 126 myń tonna janar-jaǵarmaı qory daıyndaldy
- 374 myń tonna ınertti materıaldar ázirlendi
- 4,5 mln qap qory qalyptastyryldy
- 275 myń m²-den astam aýmaqta 192 ýchaskede muz jarý jumystary júrgizildi
Jedel áreket etý úshin aýqymdy kúshter toby jasaqtalǵan: 39 myńnan astam adam, 12 myńnan astam tehnıka, 4 myńnan astam sý sorý quraldary jáne 700 júzý quraly daıyn.
Barlyq qyzmetter joǵary daıyndyq rejıminde jumys istep jatyr. Qajet bolǵan jaǵdaıda kúshter jedel túrde kúsheıtilip, sheshimder jedel qabyldanady.
- BAQ ókilderine TJM Strategııalyq josparlaý jáne jedel basqarý ortalyǵynyń Ahýaldyq zaly kórsetildi, onda sý tasqynyn boljaýdyń aqparattyq júıeleri kórsetildi,-delingen habarlamada.
Aıta keteıik, búnigi basqosýǵa Sý resýrstary jáne ırrıgatsııa mınıstrligi men «Qazgıdromet» RMK ókilderi de qatysty.
Osyǵan deıin Batys Qazaqstanda qar sýy aýylǵa kireberis joldy shaıyp ketkeni týraly jazdyq.
