Qaı óńirlerde sý tasqyny qaýpi bar
ASTANA. KAZINFORM — El óńirlerinde kóktemgi qardyń erýi kezeńinde sý basý qaýpin azaıtýǵa jáne halyqtyń qaýipsizdigin qamtamasyz etýge baǵyttalǵan keshendi profılaktıkalyq is-sharalar júrgizilip keledi. Tótenshe jaǵdaılar mınıstrligi qaı óńirlerde tasqyn sý qaýpi baryn jarııalady.
Almaty qalasynyń kommýnaldyq qyzmetteri sý tasqyny kezeńine belsendi daıyndyqty bastady: Alataý jáne Bostandyq aýdandarynda buryn maýsymdyq sý basý tirkelgen 7 ýchaske turaqty baqylaýda.
Olardyń ekeýinde — Kókqaınar shaǵyn aýdanynda Boraldaı ózeniniń arnasyn keńeıtý jáne Jáńgir-Han kóshesine sorǵy stantsııasyn ornatý sııaqty ınjenerlik is-shara bastaldy. Sý tasqynyn boldyrmaý úshin qaladan aldyn ala 147 myń m³ qar shyǵarylǵan, al ortasha syn-qaterdegi aımaqtar mamandardyń turaqty baqylaýynda.
Almaty oblysynda 45,7 shaqyrym aryq, 31 shaqyrym kanal, 4,2 shaqyrym ózen arnasy, sondaı-aq avtomobıl jáne temirjol joldarynyń astyndaǵy 21 sý ótkizý qubyry tazartyldy. Eldi mekenderden qar shyǵarý úshin oblystyń barlyq aýdandary men Qonaev, Alataý qalalarynda qar polıgondary belgilendi.
Shyǵys Qazaqstan oblysynda sý tasqynyna qarsy sharalar nátıjesinde 16 eldi mekende sý basý qaýpi tolyq joıyldy, 50 eldi mekende — syn-qater deńgeıi tómendedi, endi 5 eldi mekende qaýip bar. «Qazgıdromet» derekterine sáıkes, óńirdiń jazyq aýmaǵyndaǵy qar mólsheri qalypty normadan 112-146%-ǵa joǵary boldy.
Qar jamylǵysyndaǵy ylǵal qory, kúzgi topyraqtyń ylǵaldanýy, topyraqtyń qatý tereńdigi, temperatýranyń aýytqýyna baılanysty oblys sý tasqyny qaýpi joǵary óńirler qataryna jatqyzyldy. Altaı, Glýbokoe, Zaısan, Tarbaǵataı, Samar, Ulan jáne Úlken Naryn aýdandarynda joǵary syn-qater boljanyp otyr.
Jambyl oblysynda Tótenshe jaǵdaılar mınıstrliginiń № 28237 áskerı bólimshesi Jańaturmys aýyldyq okrýgine ornalastyryldy. Bul jumystarǵa 25 áskerı qyzmetshi jáne 2 tehnıka tartyldy. Qalyń qar túsken soń Taraz qalasyndaǵy turǵyn úı sektorynda qum salynǵan qap tóseý, aýla aýmaqtaryn erigen sýdan jáne aryq júıelerin tazartý jumystary uıymdastyryldy. Bul sýdyń erkin ótýi úshin jasaldy. Moıynqum aýdanyndaǵy Shý ózeniniń qaýipti ýchaskesine maýsymdyq gıdrologııalyq beket ornatyldy. Jańa gıdrobeket sý deńgeıin turaqty baqylaýǵa jáne yqtımal qaýipterge jedel áreket etýge múmkindik beredi.
Jetisý oblysynda sý tasqyny kezeńine aldyn ala daıyndyq júrgizilip jatyr. Jalpy 24 sý tasqynyna qarsy is-shara qolǵa alynyp, qaýipti ýchaskelerde 14 shaqyrym sý aǵyzý kanaldary jasaldy jáne tazartyldy. Úsh shaqyrym qorǵanysh bógetteri jóndeldi, 11 shaqyrym ózen arnalary men kanaldary mehanıkalyq túrde tazartylǵan. Sonymen birge, 13 shaqyrym ózen jaǵalaýy tereńdetildi jáne nyǵaıtyldy. Bul ınjenerlik sharalar oblystaǵy 17 eldi mekenniń sý basý qaýpin aıtarlyqtaı azaıtýǵa múmkindik beredi.
Aıta keteıik, aqpan aıynda Astanada sý tasqynyna qarsy aýqymdy sharalar bastaldy.