Qaı óńirlerde sýdyń beti qaıtyp, qaı oblystar tasqyn kútip otyr
ASTANA. KAZINFORM - Sý resýrstary jáne ırrıgatsııa mınıstrliginiń resmı ókili Móldir Ábdýalıevanyń aıtýynsha, vedomstvo qazir tasqyn sýdy jınaý jáne ony ótkizý úshin gıdrotehnıkalyq qurylystar men sý qoımalarynyń qaýipsiz jumysyn qamtamasyz etýdi jalǵastyryp jatyr.
— Qostanaı oblysynda sý tasqynynyń belsendi kezeńi aıaqtaldy. Sý qoımalaryna sý aǵynynyń tómendegeni baıqalady. Al, eki iri sý qoımasynyń ortasha tolýy — 92%.
Búgingi tańda sý qoımalarynda 489 mıllıon tekshe metr sý jınaldy. Bul sý aýylsharýashylyq qajettiligine paıdalanylady.
— Soltústik Qazaqstan oblysynyń eki iri sý qoımasy 100%-ǵa toldy. Sergeev sý qoımasy boıynsha sý tasqynynyń belsendi kezeńi áli ótken joq, turaqty kúrdeli jaǵdaı saqtalady. Qazsýshar mamandary aǵyndy retteý boıynsha táýlik boıy jumys júrgizip jatyr.
— Batys Qazaqstan oblysynda 4 iri sý qoımasy orta eseppen 68%-ǵa toldy. Jaıyq ózeninde sý tasqynynyń ekinshi tolqyny kútilýde.
— Shyǵys Qazaqstan oblysynda úsh iri sý qoımasynyń ortasha sý jınaý kórsetkishi 84,6%. Buqtyrma jáne Shúlbi sý qoımalaryna sýdyń aǵyny janama salalar esebinen artyp keledi. Osy aptada sý tasqyny kútilip otyr.
— Aqmola oblysynyń eki iri sý qoımasynyń ortasha sý jınaý kórsetkishi 99%, eki nysan da tranzıttik rejımde jumys istep jatyr. Munda sý tasqynynyń belsendi kezeńi jalǵasýda, saǵat saıyn monıtorıng júrgiziledi.
— Aqtóbe oblysynda eki iri sý qoımasy 98%-ǵa toly. Aımaqta sý tasqyny aıaqtalyp, jaǵdaı turaqtaldy. Sý tasqyny kezinde sý qoımalaryna 218 mıllıon tekshe metrden astam sý jınaldy. Aldaǵy ýaqytta jınalǵan sý aýylsharýashylyq qajettiligine paıdalanylady.
— Qaraǵandy oblysynyń 4 iri sý qoımasy 100% toldy, oblysta sý tasqynynyń belsendi kezeńi aıaqtaldy. Sý tasqyny kezinde sý qoımalaryna 192 mıllıon tekshe metrden astam sý jınaldy. Bul sý aýylsharýashylyq qajettigine paıdalanylady.
«Barlyq nysandarda táýlik boıy kezekshilik jalǵasady, sondaı-aq sý aıdyndaryndaǵy ahýalǵa saǵat saıyn monıtorıng júrgiziletinin atap ótemin. Sondaı-aq, qazirgi ýaqytta Sý resýrstary jáne ırrıgatsııa mınıstri Nurjan Nurjigitov Batys Qazaqstan oblysynda júr. Mınıstr sý qoımalarynda tasqyn sýdy qaýipsiz ótkizý jáne erigen qar sýyn jınaý jumysyn qadaǵalaıdy», — deıdi Móldir Ábdýalıeva.
