Qaı óńirlerde sý tasqyny qaýpi joǵary – Qazgıdromet boljamy

ASTANA. KAZINFORM – Qazaqstannyń birqatar óńirinde topyraqtyń shamadan tys ylǵaldanýy men jerdiń qatty tońazýy kóktemgi sý tasqyny qaýpin kúsheıtýi múmkin. Bul týraly Ortalyq kommýnıkatsılar alańynda ótken dóńgelek ústelde «Qazgıdromet» RMK bas dırektorynyń birinshi orynbasary Áset Qalıev málimdedi.

Onyń aıtýynsha, qazirgi tańda Batys Qazaqstan, Mańǵystaý, Pavlodar, Shyǵys Qazaqstan, Abaı jáne Jetisý oblystarynda topyraqtaǵy ylǵal mólsheri joǵary. Sondaı-aq Atyraý, Qostanaı, Qaraǵandy jáne Almaty oblystarynyń jekelegen aýdandarynda da ylǵal deńgeıi qalypty kórsetkishten asyp otyr.

Al qardaǵy sý qory Shyǵys Qazaqstan men Abaı oblystarynda, sondaı-aq Aqmola, Pavlodar jáne Soltústik Qazaqstan oblystarynyń basym bóliginde joǵary deńgeıde qalyptasqan. Bul kóktemde qar erigen kezde sý kóleminiń artýyna áser etedi.

Mamandardyń málimetinshe, bıyl el aýmaǵynyń kóp bóliginde topyraq ótken jylmen salystyrǵanda qattyraq tońazyǵan. Sonymen qatar birqatar óńirde muz qabaty qalyptasqan.

Osy faktorlar kóktemgi sý tasqyny qaýpin arttyrýy múmkin. Boljam boıynsha, joǵary táýekel aımaqtaryna Soltústik Qazaqstan, Aqmola, Qaraǵandy, Abaı jáne Shyǵys Qazaqstan oblystary jatady.

Ortasha táýekel Qostanaı, Pavlodar, Batys Qazaqstan, Aqtóbe, Ulytaý, Túrkistan, Almaty jáne Jetisý oblystarynda kútiledi. Al Atyraý, Mańǵystaý, Qyzylorda jáne Jambyl oblystarynda qaýip deńgeıi tómen.

– «Qazgıdromet» gıdroposttarda táýlik boıy baqylaý júrgizedi. Jaǵdaı kúrt ózgerse, aqparat ýaqtyly jetkiziledi, – dedi Áset Qalıev.

Aıta keteıik, buǵan deıin tasqynnyń aldyn alý úshin sý qoımalarynan sý jiberilip jatqany habarlanǵan bolatyn.